उद्या 308 महिला आणि 307 पुरुष ठरवणार सोलापूरचा नवा आमदार…!

सोलापूर विधान परिषद निवडणुकीसाठी उद्या सकाळी आठ ते सायंकाळी चार वाजेपर्यंत शहरातील दोन आणि ग्रामीण भागातील सहा मतदान केंद्रावर मतदान होणार आहे. याचे साहित्य वाटप आज करण्यात आले. या निवडणुकीत भाजपकडून राजा राऊत आणि राष्ट्रवादी शरद पवार गटाकडून वसंत देशमुख आपले नशीब आजमावत आहेत. या दोघांना उद्या 17 नगरपालिका आणि नगरपंचायतीचे 426, जिल्हा परिषदेचे 79 आणि महापालिकेचे 110 असे 615 मतदार मतदान करणार आहेत.. यामध्ये 307 पुरुष आणि 308 महिला मतदारांचा समावेश आहे. कुर्डूवाडी प्रांत कार्यालयातील मतदान केंद्रावर ८०, उत्तर सोलापूर तहसील कार्यालयातील मतदान केंद्रात 188, दक्षिण सोलापूर तहसील कार्यालयातील मतदान केंद्रात 89, पंढरपूर तहसील कार्यालयातील मतदान केंद्रात 100, मंगळवेढा तहसील कार्यालयात 62 आणि अकलूज प्रांत कार्यालयातील मतदान केंद्रात 97 जणांचे मतदान होणार आहे. भाजपने आपली मते फुटू नयेत म्हणून जोरदार फिल्डिंग लावली आहे. ही निवडणूक खऱ्या अर्थाने पालकमंत्री जयकुमार गोरे विरुद्ध खासदार धैर्यशील मोहिते पाटील यांच्यातच आरोप प्रत्यारोपामुळे गाजली. याचा फैसला 22 जून रोजी होणार आहे. निवडणुकीसाठी मोठा पोलीस बंदोबस्त लावण्यात आला असून सर्व मतदान केंद्रावर वेब कास्टिंग करण्यात येणार आहे अशी माहिती जिल्हाधिकारी कार्तिकेयन यांनी दिली.