सोलापूर : जिल्हा परिषद कर्मचारी सहकारी पतसंस्था क्र. १, सोलापूरची सर्वसाधारण सभा शनिवार, १३ जून रोजी डॉ. निर्मलकुमार फडकुले सभागृहात आयोजित करण्यात आली आहे. या पार्श्वभूमीवर आयोजित पत्रकार परिषदेत संस्थेच्या आर्थिक प्रगतीची आणि विविध सामाजिक उपक्रमांची माहिती देण्यात आली. यंदाच्या वर्षी 1089 सभासदांना 90 लाख रुपयांचा लाभांश दिला जाणार असल्याची माहिती संस्थेचे व्हाईस चेअरमन श्रीधर कलशेट्टी यांनी पत्रकार परिषदेत दिली
संस्थेची आर्थिक स्थिती भक्कम असल्याचे सांगताना पदाधिकाऱ्यांनी भागभांडवल २० कोटी रुपये, बचत ठेवी ५ कोटी २१ लाख रुपये तसेच राखीव व इतर निधी ३ कोटी ४६ लाख रुपये इतका असल्याची माहिती दिली. संस्थेची गुंतवणूक १ कोटी ८८ लाख रुपये असून कर्ज येणे २८ कोटी ५२ लाख रुपये इतके आहे.
संस्थेने सामाजिक क्षेत्रातही उल्लेखनीय कार्य केले असून या कार्याबद्दल राज्यस्तरीय पुरस्कार प्राप्त झाला आहे. जिल्हाधिकारी यांच्या आवाहनाला प्रतिसाद देत मुख्य कार्यकारी अधिकाऱ्यांच्या माध्यमातून संस्थेने पूरग्रस्तांच्या मदतीसाठी १ लाख ११ हजार रुपयांची आर्थिक मदत दिली असल्याचेही यावेळी सांगण्यात आले.
सभासदांच्या हिताला प्राधान्य देत संस्थेने यंदा ३.७५ टक्के लाभांश आणि ४ टक्के बचत ठेव व्याजदर देण्याचा प्रस्ताव ठेवला आहे. सुमारे 90 लाख रुपयांचा लाभांश सभासदांच्या बँक खात्यात जमा करण्यात येणार आहे. संस्थेचे कर्जावरील व्याजदर केवळ ६ टक्के असून एसएमएस व एनईएफटीसारख्या आधुनिक सुविधाही उपलब्ध करून देण्यात आल्या आहेत.
रक्तदान शिबिरे, सामाजिक जनजागृती उपक्रम तसेच विविध समाजोपयोगी कार्यक्रम नियमितपणे राबविले जात असल्याचे पदाधिकाऱ्यांनी सांगितले. टर्म विमा योजनेअंतर्गत सदस्यांच्या वारसांना २ लाख रुपयांपर्यंत मदत दिली जाते, अशी माहितीही यावेळी देण्यात आली.
पत्रकार परिषदेला संस्थेच्या अध्यक्षा श्रीमती एस. ई. राजत, चेअरमन श्रीधर कलशेट्टी तसेच संचालक मंडळातील पदाधिकारी व सदस्य उपस्थित होते.
मुख्य मुद्दे :
सभासदांना १० लाख रुपयांचा लाभांश वाटप
भागभांडवल २० कोटी रुपये
बचत ठेवी ५.२१ कोटी रुपये
कर्जावरील व्याजदर फक्त ६ टक्के
सामाजिक कार्यासाठी राज्यस्तरीय पुरस्कार
पूरग्रस्त मदतीसाठी १.११ लाख रुपयांची मदत
