TOP 25 । खरंच पालकमंत्र्यांच्या आवाहनानंतर सोलापूरची विधानपरिषद निवडणूक बिनविरोध होणार ?

राज्यातील 17 स्थानिक स्वराज्य संस्था मतदार संघाच्या निवडणुका जाहीर झाल्या आहेत. सोमवारपासून प्रत्यक्ष उमेदवारी अर्ज भरण्याची प्रक्रिया सुरू होणार आहे. तर 18 जून रोजी मतदान होणार आहे. या सर्वच ठिकाणी विविध पद्धतीची राजकीय गणिते जुळवून उमेदवारी दिल्या जात आहेत. त्यातच सोलापूरची उमेदवारी कोणाला मिळणार याची उत्सुकता आहे. माजी आमदार प्रशांत परिचारक, माजी आमदार राजा राऊत, माजी आमदार राजन पाटील, माजी आमदार राम सातपुते, यांच्यासोबतच आता शहाजी पवार तसेच आमदार सुभाष देशमुख यांचे सुपुत्र रोहन देशमुख या नव्या नावांची देखील चर्चा सुरू झाली आहे. सोलापूर जिल्हा परिषद, महापालिका, नगरपालिका आणि नगरपंचायतींचे मिळून 616 सदस्य हे नवा आमदार निवडणार आहेत. सुमारे साडेतीनशे पेक्षा जास्त मते ही भाजपची आहेत. विरोधकांची सदस्य संख्या नगण्य आहे. अशातच पालकमंत्री जयकुमार गोरे यांनी काल मोठे वक्तव्य करून ही निवडणूक बिनविरोध करावी आणि नवीन पायंडा पाडावा असे आवाहन केले आहे. त्यामुळे खरंच पालकमंत्री जयकुमार गोरे यांच्या आवाहनाला विरोधी पक्ष किती साथ देतोय हे पुढच्या आठवड्यात समजणार आहे.