टेंभुर्णी : उजनी धरणाच्या पाणीसाठ्यात सातत्याने वाढ होत असून, बुधवार (22 जुलै 2026) रोजी सायंकाळी 6.00 वाजेपर्यंत धरणातील उपयुक्त (लाईव्ह) पाणीसाठा 53.75 टक्क्यांपर्यंत पोहोचला आहे. धरणातील उपयुक्त पाणीसाठा 815.55 दशलक्ष घनमीटर (28.80 टीएमसी) इतका नोंदविण्यात आला आहे.
धरणाची जलपातळी 494.525 मीटर असून, धरणातील एकूण पाणीसाठा 2611.36 दशलक्ष घनमीटर (92.46 टीएमसी) इतका झाला आहे. तसेच धरणाचा जलपृष्ठ विस्तार 274.49 चौ. कि.मी. इतका नोंदविण्यात आला आहे.
दौंड येथील नदी मापन केंद्रावर नदीची पातळी 499.020 मीटर असून, उजनी धरणात 12,797 क्युसेक पाण्याची आवक सुरू आहे. धरण परिसरात आज पावसाची नोंद 0 मिमी झाली असून, हंगामातील एकूण पर्जन्यमान 147 मिमी इतके झाले आहे.
धरणातून सायंकाळी 6.00 वाजेपर्यंत 700 क्युसेक पाणी सांडव्यातून, 1,600 क्युसेक वीजगृहातून, 2,000 क्युसेक मुख्य कालव्यातून, 900 क्युसेक भिमा-सीना बोगद्यातून, 280 क्युसेक सीना-माढा उपसा सिंचन योजनेसाठी आणि 90 क्युसेक दहीगाव उपसा सिंचन योजनेसाठी सोडण्यात येत होते.
दरम्यान, धरण प्रशासनाने रात्री 8.30 वाजल्यापासून सांडव्यातून होणारा 700 क्युसेकचा विसर्ग पूर्णपणे बंद केला आहे. त्यामुळे त्यानंतर नदीपात्रात केवळ वीजगृहातून 1,600 क्युसेक इतकाच विसर्ग सुरू असून, नदीतील एकूण विसर्ग 1,600 क्युसेक इतका राहिला आहे.
धरणातील पाणीसाठ्यात होत असलेली वाढ आणि सिंचनासाठी सुरू असलेला कालव्याचा विसर्ग यामुळे सोलापूर जिल्ह्यासह लाभक्षेत्रातील शेतकऱ्यांना दिलासा मिळत असून, पुढील पावसाच्या परिस्थितीनुसार धरणाच्या विसर्गात आवश्यक ते बदल करण्यात येण्याची शक्यता आहे.
