सोलापूर : विजापूर वेस परिसरातील दुकाने सात वाजून गेले तरी चालू असल्याने पोलिसांनी दुकाने तातडीने बंद करण्याचे आवाहन केल्यानंतर मोठा जमाव जमल्यामुळे पोलीस आणि व्यापाऱ्यांमध्ये बाचाबाची झाली .यावेळी काही व्यापाऱ्यांनी पोलिसांशी हुज्जत घालण्यास सुरुवात केल्यामुळे वातावरणात तणाव निर्माण झाला होता. अखेर पोलिसांनी त्यांच्या भाषेत समजल्यानंतर व्यापाऱ्यांनी सव्वा सात च्या सुमारास दुकाने बंद केली. जेल रोड पोलिस चौकी चे वरिष्ठ पोलीस निरीक्षक शिवाजी राऊत हे तातडीने घटनास्थळी दाखल झाल्यामुळे तणाव निवळला. यावेळी व्यापाऱ्यांनी एकच गर्दी केल्यामुळे जमाव बंदीच्या आदेशाचे देखील उल्लंघन झाल्याचे दिसून आले. या भागातील दुकाने नेहमीच ठरवून दिलेल्या वेळेनंतर देखील सुरू असल्याचे दिसून येते . त्यामुळे पोलिसांनी केवळ समज देऊन हा प्रश्न सुटणार नसल्याचे मत या भागातील नागरिक व्यक्त करीत होते. विजापूर वेस भागातील व्यापारी अनेक वेळा मास्क न घालता व्यवहार करीत असल्याचेही दिसून येते. परंतु त्यांच्या विरुद्ध कारवाई होताना दिसत नाही.