सोलापूर – पुण्यश्लोक अहिल्यादेवी होळकर सोलापूर विद्यापीठाच्या २२ व्या युवा महोत्सवात बार्शी येथील श्री शिवाजी महाविद्यालयाचा परिसर कलाविष्कारांनी अक्षरशः फुलून गेला आहे. महोत्सवाच्या दुसऱ्या दिवसाची सुरुवात मुख्य रंगमंचावर झालेल्या शास्त्रीय नृत्याच्या सुरेल आणि देखण्या सादरीकरणाने झाली. नृत्याच्या प्रत्येक पदन्यासातून भारतीय संस्कृतीची समृद्ध परंपरा आणि कलाविष्काराची नजाकत रसिकांसमोर उलगडत गेली.
दुसऱ्या दिवसाच्या प्रारंभी श्री शिवाजी महाविद्यालय, बार्शी येथील विद्यार्थ्याने सादर केलेल्या शास्त्रीय नृत्याने रसिकांची मने जिंकली. भावमुद्रा, नेत्राभिनय, पदन्यास आणि तालबद्ध हालचाली यांचा सुरेख मिलाफ साधत विद्यार्थ्याने रंगमंचावर नृत्याची अनुपम छटा उमटवली. तबल्याच्या ठेक्यावर पडणाऱ्या घुंगरांच्या नादाने संपूर्ण वातावरण भारावून गेले.
यानंतर संगमेश्वर महाविद्यालय, सोलापूर तसेच वालचंद अभियांत्रिकी महाविद्यालय, सोलापूर यांसह कॉलेज ऑफ फार्मसी सोलापूर, हिराचंद नेमचंद कॉलेज, दयानंद महाविद्यालयांच्या विद्यार्थ्यांनी शास्त्रीय नृत्याचे मनोहारी सादरीकरण केले. प्रत्येक कलाकाराने आपल्या नृत्यातून भारतीय शास्त्रीय नृत्यपरंपरेतील लय, ताल, भाव, अभिनय आणि अंगभूत सौंदर्य यांचा प्रत्यय रसिकांना करून दिला. एकूण 11 महाविद्यालयांच्या विद्यार्थ्यांनी यात सहभाग घेतला.
कथ्थक, कुचीपुडी आदी नृत्यप्रकारांच्या सादरीकरणाने रंगमंचावर विविधतेतून भारतीय नृत्यसंस्कृतीचे दर्शन घडले. काही क्षणी नृत्याच्या नाजूक पदलालित्याने वातावरण मंत्रमुग्ध झाले, तर काही क्षणी वेगवान पदन्यास आणि तबल्याच्या ठेक्याने रंगमंचावर चैतन्याची लहर उमटली. कलाकारांच्या घुंगरांचा निनाद, तालवाद्यांची साथ आणि भावमुद्रांमधून व्यक्त होणाऱ्या कथानुभूतीने उपस्थित रसिकांना खिळवून ठेवले.
युवा कलावंतांच्या प्रतिभेला व्यासपीठ देणाऱ्या युवा महोत्सवाच्या या रंगमंचावर शास्त्रीय नृत्याने भारतीय कलापरंपरेचा अभिजात वारसा जपण्याबरोबरच नव्या पिढीच्या कलासक्तीचेही दर्शन घडविले. विविध महाविद्यालयांतील विद्यार्थ्यांनी सादर केलेल्या या नृत्याविष्काराला उपस्थितांकडून उत्स्फूर्त दाद मिळाली.
