आजच निघाला आदेश
शिवछत्रपती शिक्षक संघटनेचे यश
सोलापूर जिल्ह्यातील प्राथमिक शिक्षण विभागात कार्यरत असणाऱ्या आणि 2013 – 14 मध्ये अतिरिक्त ठरलेल्या सुमारे 70 शिक्षकेतर कर्मचाऱ्यांच्या पगाराचा प्रश्न मिटला आहे.या प्रश्नासाठी महाराष्ट्र राज्य शिवछत्रपती शिक्षक संघटनेच्या वतीने आमदार ज्ञानेश्वर म्हात्रे यांच्या नेतृत्वाखाली आंदोलन सातत्याने पाठपुरावा करण्यात आला होता.
यासंदर्भात पुणे विभागाचे शिक्षण उपसंचालक डाॅ. गणपत मोरे यांनी आज दोन डिसेंबर आदेश काढून या सर्व शिक्षकेतर कर्मचाऱ्यांचे समायोजन माध्यमिक शाळेत किंवा माध्यमिक शाळेत जागा उपलब्ध नसेल तर शासन निर्णयानुसार इतर खात्यात लिपिक वर्गावर समायोजन करण्यात यावे असा आदेश दिला आहे.
बालकांचा मोफत व सक्तीच्या शिक्षणाचा हक्क अधिनियम 2009 अमलात आल्यानंतर मुंबई उच्च न्यायालयाच्या रेट पिटीशन 95/ 2010 च्या निर्णयातील आठव्या परिच्छेदानुसार शैक्षणिक वर्ष 2013 – 14 च्या सेवकसंचामध्ये अनुदानित मराठी माध्यम प्राथमिक शाळेतील कार्यरत असलेले लिपिक व शिपाई पदे गोठवण्यात आली. उच्च न्यायालयाकडून याचिका क्रमांक 9026/ 2014 मधील प्रकरणांमध्ये शासन निर्णय वैध असल्याचा निकाल दिलेला होता. त्यामुळे या पदावर कार्यरत असणारे शिक्षकेतर पदे 2013 – 2014 च्या सेवकसंच व त्यानंतरच्या सेवकसंचांमध्ये अतिरिक्तच ठरलेले आहेत. परंतु सन 2024 – 25 च्या सेवकसंचामध्ये शिक्षकेतर कर्मचारी यांची पदे शून्य दर्शवल्याने या कर्मचाऱ्यांच्या पगाराचा प्रश्न निर्माण झाला होता.शिक्षण उपसंचालक डॉ. गणपत मोरे यांनी विशेष आदेश काढून सोलापूरचे प्राथमिक विभागाचे शिक्षणाधिकारी कादर शेख यांना याबाबत समायोजनेची कार्यवाही करून अहवाल सादर करण्यास आदेशान्वये सांगितले आहे.
यासाठी संघटनेचे पश्चिम महाराष्ट्र अध्यक्ष आप्पासाहेब पाटील, शिक्षकेतर कर्मचारी संघटनेचे जिल्हाध्यक्ष नागेश बिडवे, प्राथमिक विभागाचे जिल्हाध्यक्ष भिमराया कापसे, शहराध्यक्ष मुरलीधर कडलासकर यांनी विशेष परिश्रम घेतले.
