सहा महिन्यांत २ लाख ४१ हजारांहून अधिक कार्डांची निर्मिती; ९.५२ लाख नागरिकांना आरोग्य सुरक्षा कवच
येस न्यूज नेटवर्क : आयुष्मान भारत आणि महात्मा ज्योतिराव फुले जन आरोग्य योजनेअंतर्गत आयुष्मान कार्ड निर्मिती व वितरणात सोलापूर जिल्ह्याने उल्लेखनीय कामगिरी केली आहे. राज्यातील क्रमवारीत १२व्या स्थानावर असलेल्या सोलापूरने थेट दुसऱ्या क्रमांकावर झेप घेतली आहे.
जिल्ह्यात १ एप्रिल ते १९ सप्टेंबर २०२६ या अवघ्या सहा महिन्यांत २ लाख ४१ हजार १५६ नवीन आयुष्मान कार्डांची निर्मिती करण्यात आली. या कालावधीत झालेल्या कामामुळे कार्ड निर्मितीच्या कामगिरीत पूर्वीच्या तुलनेत ७४ टक्क्यांनी वाढ झाली आहे.एप्रिल २०२६ पूर्वी जिल्ह्यात ७ लाख ११ हजार ८१ कार्डे वितरित झाली होती. त्यात नव्या २ लाख ४१ हजार १५६ कार्डांची भर पडल्याने जिल्ह्यातील एकूण कार्डांची संख्या ९ लाख ५२ हजार २३७ झाली आहे.
आयुष्मान कार्डच्या माध्यमातून पात्र नागरिकांना योजनेअंतर्गत आरोग्य उपचारांचा लाभ मिळतो. जिल्ह्यातील साडेनऊ लाखांहून अधिक नागरिकांपर्यंत हे आरोग्य सुरक्षा कवच पोहोचल्याने अनेक कुटुंबांना महागड्या उपचारांच्या खर्चापासून दिलासा मिळण्यास मदत होणार आहे.जिल्हा आरोग्य विभागाच्या विशेष मोहिमेमुळे ही कामगिरी शक्य झाली असून, उर्वरित पात्र नागरिकांपर्यंतही आयुष्मान कार्ड पोहोचविण्यासाठी प्रयत्न सुरू असल्याचे प्रशासनाने सांगितले.
