सोलापूर जिल्ह्यात वाढू लागली शिंदे गटाची ताकद, उपमुख्यमंत्र्यांच्या उपस्थितीत दोघांचा होणार प्रवेश

सोलापूर जिल्ह्यात गेल्या वर्षभरात शिंदे सेनेची ताकद चांगलीच वाढू लागली आहे. सध्या काँग्रेसमध्ये असलेले पंढरपूरचे भगीरथ भालके आणि राष्ट्रवादी शरद पवार गटात असलेले अनिल सावंत हे 12 एप्रिल रोजी स्वतःच्या पक्षाला रामराम ठोकून शिवसेना शिंदे गटात प्रवेश करणार आहेत. त्यांच्या प्रवेशासाठी उपमुख्यमंत्री एकनाथ शिंदे हे 12 एप्रिल रोजी दुपारी दोन वाजता पंढरपुरात येऊन पक्षप्रवेश करून जाहीर मेळावा घेणार आहेत. भगीरथ भालके यांच्या पत्नी प्रणिता भालके या पंढरपूर नगरपालिकेच्या नगराध्यक्ष आहेत. विरोधी पक्षात राहिल्यास निधी मिळणार नाही त्यामुळे भालके यांनी शिंदे सेने सोबत जाण्याचा निर्णय घेतला आहे. भालके यांनी काँग्रेसकडून तर अनिल सावंत यांनी राष्ट्रवादी शरद पवार गटाकडून विधानसभेची निवडणूक लढवली होती. आता या दोघांनाही शिंदे सेनेचे बळ मिळणार आहे. यानिमित्ताने एकनाथ शिंदे पंढरपूर दौऱ्यावर येणार असल्यामुळे एकूणच शिंदे सेनेमध्ये उत्साहाचे वातावरण निर्माण झाले असून भालके विधानसभेच्या तयारीला आतापासूनच लागले आहेत अशी पंढरीत चर्चा सुरू झाली आहे.