सोलापूर – कोणी एकेकाळी मुख्यमंत्री आणि उपमुख्यमंत्री एका जिल्ह्याचे.. एका जिल्ह्याला आठ – आठ मंत्रिपदे… एवढेच नव्हे तर एकाच जिल्ह्यासाठी स्वतंत्र विद्यापीठ.. यामुळे राज्याच्या राजकारणात सोलापूरचा दबदबा होता. केंद्रीय मंत्री नितीन गडकरी यांनी सुमारे 28 हजार कोटी रुपयांचे रस्ते सोलापूर शहर जिल्ह्यातील विकसित केल्यामुळे धार्मिक पर्यटनाला गती मिळाली आहे. मंत्रीपदापासून वंचित राहिलेल्या सोलापूरची गेल्या पंधरा वर्षापासून रखडलेली विमानसेवा नुकतीच सुरू झाली आहे. आयटी पार्क ची चर्चा जोमाने सुरू झाली आहे. यामुळे सोलापूर देशाच्या नकाशावर झळकू लागले असतानाच गेल्या दोन दिवसापासून तीन महत्त्वाच्या गोष्टीमुळे सोलापूर देशाच्या हिटलिस्टवर आले आहे.
अल कायदा या दहशतवादी संघटनेच्या जुबेर हंगेरकर याच्या संपर्कात सोलापूरचे तिघेजण असल्यामुळे खळबळ निर्माण झाली. अलकायदाचे सोलापूर कनेक्शन अनेकांना टेन्शन देणारे ठरले. मुंबईमध्ये 17 मुले ओलीस ठेवून राज्यात खळबळ निर्माण करणारा आणि पोलिसांच्या चकमकीत ठार झालेला रोहित आर्या हा देखील मूळचा सोलापूरचाच असल्याचे निष्पन्न झाले . हे कमी होते म्हणून की काय 2023 मध्ये महाराष्ट्र केसरी किताब पटकावणारा सिकंदर शेख हा शस्त्र तस्करी प्रकरणात अडकला. पंजाब व हरियाणा मधील कुख्यात पपला गुर्जर टोळीशी त्याचा संबंध असल्यामुळे त्याला बेड्या टाकण्यात आल्या. या तीन घटकामुळे सोलापूर देशाच्या हिटलिस्टवर आले आहे.
