सुरक्षा, आपत्ती व्यवस्थापन व बचावकार्यातील उल्लेखनीय कार्याची दखल; सहा पुरस्कारांनी सोलापूरचा सन्मान
सोलापूर : सुरक्षा, आपत्ती व्यवस्थापन आणि बचावकार्यात उल्लेखनीय योगदान देणाऱ्या अधिकारी, व्यक्ती व संस्थांचा मुंबई येथे आयोजित सहाव्या ‘सेफ-टेक पुरस्कार, परिषद व प्रदर्शन २०२६’मध्ये गौरव करण्यात आला. या पुरस्कार सोहळ्यात सोलापूर जिल्ह्याच्या आपत्ती व्यवस्थापन विभागाच्या उत्कृष्ट कार्याची राष्ट्रीय स्तरावर दखल घेत जिल्ह्याला एकूण सहा पुरस्कारांनी सन्मानित करण्यात आले.
किंग्ज एक्सप्लो मीडिया यांच्या वतीने ३ सप्टेंबर २०२६ रोजी मुंबईतील हॉटेल ताज येथे ‘सहावा सेफ-टेक पुरस्कार, परिषद व प्रदर्शन २०२६’चे आयोजन करण्यात आले होते. देशभरातील सुरक्षा, आपत्ती व्यवस्थापन, अग्निशमन आणि बचावकार्यात उल्लेखनीय कामगिरी करणाऱ्या १३५ अधिकारी, व्यक्ती व संस्थांचा या वेळी गौरव करण्यात आला.
जिल्हा आपत्ती व्यवस्थापन अधिकाऱ्यांचा विशेष सन्मान
सोलापूर जिल्ह्याचे जिल्हा आपत्ती व्यवस्थापन अधिकारी शक्तीसागर ढोले यांना ‘बेस्ट ऑफिसर’ या विभागात ‘बेस्ट फायर फायटर अँड रेस्क्युअर ऑफ द इयर’ पुरस्काराने सन्मानित करण्यात आले. आपत्तीच्या काळात तत्परतेने कार्यवाही करणे, बचावकार्याचे प्रभावी नियोजन आणि विविध आपत्कालीन परिस्थितींमध्ये केलेल्या उल्लेखनीय कामगिरीची दखल घेऊन त्यांना हा पुरस्कार प्रदान करण्यात आला.
डीआरएफच्या जवानांचाही राष्ट्रीय स्तरावर गौरव
सोलापूर जिल्हा आपत्ती प्रतिसाद दलातील (डीआरएफ) बजरंग होटकर, रामचंद्र वाघमारे, सागर धप्पाधुळे, शुभांगी गवते आणि अरुणा राठोड यांना पूरपरिस्थितीतील बचावकार्य, आग प्रतिबंधक उपाययोजना, आपत्कालीन बचावकार्य तसेच गर्दी नियंत्रणामध्ये केलेल्या उल्लेखनीय कामगिरीबद्दल ‘फर्स्ट रिस्पॉन्डर अँड रेस्क्युअर’ या विभागात ‘बेस्ट फायर फायटर अँड रेस्क्युअर ऑफ द इयर’ पुरस्काराने गौरविण्यात आले.
तत्परता, धैर्य आणि सेवाभावाची राष्ट्रीय स्तरावर दखल
आपत्ती व्यवस्थापनाच्या विविध प्रसंगी जिल्हा आपत्ती व्यवस्थापन विभागातील अधिकारी आणि डीआरएफच्या जवानांनी तत्परता, धैर्य, शिस्त आणि सेवाभावाने काम केले आहे. पूर, आग, गर्दी नियंत्रण तसेच अन्य आपत्कालीन परिस्थितींमध्ये नागरिकांच्या सुरक्षिततेला प्राधान्य देत करण्यात आलेल्या कार्याची या पुरस्कारांच्या माध्यमातून राष्ट्रीय स्तरावर दखल घेण्यात आली आहे.
निवासी उपजिल्हाधिकाऱ्यांकडून अभिनंदन
सोलापूर जिल्ह्याच्या आपत्ती व्यवस्थापन विभागाला मिळालेल्या या सन्मानाबद्दल निवासी उपजिल्हाधिकारी अभिजित पाटील यांनी जिल्हा आपत्ती व्यवस्थापन अधिकारी शक्तीसागर ढोले तसेच डीआरएफच्या सर्व स्वयंसेवकांचे अभिनंदन केले. आपत्तीच्या काळात नागरिकांच्या मदतीसाठी तत्पर राहून केलेल्या कार्याचे कौतुक करून त्यांनी अधिकारी व जवानांना पुढील कार्यासाठी शुभेच्छा दिल्या.
या सहा पुरस्कारांमुळे सोलापूर जिल्ह्याच्या आपत्ती व्यवस्थापन विभागाच्या कार्यक्षमतेसह अधिकारी आणि बचाव पथकाच्या सेवाभावी कार्याला राष्ट्रीय स्तरावर मान्यता मिळाली असून, हा सन्मान जिल्ह्यासाठी अभिमानाची बाब ठरला आहे.
