सोलापूर जिल्ह्यातील कुमारी शांभवी रामण्णा अजगुंडे हिने आपल्या जिद्द, मेहनत आणि विज्ञानातील आवडीच्या जोरावर उल्लेखनीय यश संपादन केले आहे. लहानपणापासूनच विज्ञान, नवनवीन प्रयोग आणि संशोधनाची आवड असलेल्या शांभवीने सातत्यपूर्ण अभ्यास, सराव आणि शिक्षक व कुटुंबाच्या मार्गदर्शनातून आपली वाटचाल सुरू ठेवली. इयत्ता दहावीच्या परीक्षेत 98 टक्के गुण मिळवत तिने शैक्षणिक क्षेत्रातही उल्लेखनीय कामगिरी केली. गणित विषयात 100 पैकी 100 गुण मिळवले.
बालसुरक्षेसाठी तिने ‘Safe Fly – Smart ID Card Based Child Safety and Guidance Device’ ही अभिनव वैज्ञानिक संकल्पना विकसित केली. या प्रकल्पाची INSPIRE राष्ट्रीय स्तरावरील प्रदर्शनासाठी निवड झाली. दिल्ली येथील भारत मंडपममध्ये राष्ट्रीय स्तरावर तिने आपल्या प्रकल्पाचे सादरीकरण केले. या प्रवासातून तिला जपानच्या शैक्षणिक दौऱ्याची संधीही मिळाली आहे. शांभवीच्या संशोधनाची दखल राष्ट्रीय स्तरावर घेतली जात असून NASA संदर्भातील निवड प्रक्रियेतही तिचे नाव चर्चेत आले आहे.
विज्ञानाबरोबरच क्रीडा, बुद्धिबळ, कथ्थक आणि विविध स्पर्धांमध्येही तिने आपली गुणवत्ता सिद्ध केली आहे. विविध शैक्षणिक संस्था, सामाजिक संघटना आणि मान्यवरांकडून तिचा गौरव करण्यात आला आहे.
ग्रामीण भागातून आलेली एक विद्यार्थिनी आपल्या कल्पकतेच्या आणि मेहनतीच्या जोरावर राष्ट्रीय आणि आंतरराष्ट्रीय स्तरावर झेप घेऊ शकते, याचे शांभवी हे प्रेरणादायी उदाहरण ठरत आहे. तिच्या यशामुळे सोलापूर जिल्ह्याच्या शिरपेचात मानाचा तुरा रोवला गेला आहे.
