सोलापूर | रत्नाई शिवारात या ! शेतीमध्ये मौज.. मजा.. मस्तीचा.. आनंद लुटा…! Ratnai Shivar Degaon

येस न्युज मराठी नेटवर्क : शेती पर्यटन म्हणजेच ऍग्रो टुरिझम ही संकल्पना सोलापुरात आता चांगल्या पद्धतीने रुजू होऊ लागली आहे. मातीवर प्रेम करणाऱ्या शेतकऱ्यांनी अनेक नवनवीन प्रयोग करत या शेतीला एक नवे रूप देण्याचा प्रयत्न केला आहे. असाच एक सुंदर निसर्ग शेती पर्यटनाचा प्रयोग केला आहे सोलापुरातील सिद्धाराम गुंगे या शेतकऱ्याने….
पारंपरिक शेतीला त्यांनी आता निसर्ग पर्यटनाची जोड दिली आहे. त्यामुळे शहरात राहणाऱ्या लोकांना शेतीमध्ये जाऊन मौज मजा आणि मस्तीचा आनंद लुटण्यासाठी आणि दिवसभर विरंगुळा करण्यासाठी नागरीक रत्नाई शिवारात येत आहे. सोलापूर मंगळवेढा रोड वरती सोलापूर पासून अवघ्या तीन किलोमीटर अंतरावर देगाव टोलनाक्याजवळ रत्नाई शिवार आहे. शेतीमध्ये निसर्गाचा आनंद लुटत विविध मनोरंजनाची साधने देखील या ठिकाणी असल्यामुळे नागरिकांना सकाळी नऊ ते सायंकाळी पाचपर्यंत दिवस कसा संपतो हे देखील लक्षात येत आहे. सिद्धाराम घुंगे परिवाराने हे रत्नाई शिवार फुलवण्यासाठी तनमनधनाने प्रयत्न केले आहेत.
या रत्नाई शिवार मध्ये हुरडा पार्टीची मजा काही वेगळीच आहे . समोरच धगधगत्या आगटी मध्ये ज्वारीची कणसे भाजणे…हुरडा चोळणे आणि सोलापूरची शेंगा चटणी…ठेचा…वांगी यांच्यासमवेत हुरडा पार्टीचा आनंद लुटणे ही मजा काही औरच आहे. त्यामुळे हुरडा पार्टी म्हंटल की आता रत्नाई शिवार असं समीकरण होऊ लागलं आहे.
बैलगाडी मध्ये बसल्यानंतर निश्चित प्रत्येकाला आपलं बालपण आठवतं त्यामुळे याठिकाणी बैलगाडीच्या रपेट सह ट्रॅक्टरची राइड देखील आपल्याला एक वेगळा आनंद देऊन जाते. आयुष्यातील चढ-उताराची साक्ष देणारे इथले झोके … मनोरंजनाची साधने.. यामुळे बालगोपाळ रमून जातात. चुलीवरचं अस्सल जेवण.. सोलापूरची खीर..कडक भाकरी… शेंगा चटणी यामुळे इथली चव जिभेवर रेंगाळते आणि निसर्ग डोळ्यांमध्ये साठवून राहतो.
रत्नाई शिवार मध्ये निसर्गरम्य वातावरण असून याठिकाणी चिकूच्या बागेत फिरण्याचा आनंद देखील पर्यटकांना मिळतो . सोलापूरचा हुरडा…ग्रामीण भागात तयार झालेले विविध पदार्थ तसेच इतर वस्तू देखील या ठिकाणी खरेदी करायला मिळतात. इथं वाढदिवस साजरा करण्यासाठी किंवा कोणतेही सेलिब्रेशन करण्यासाठी अनेक जण इथे येतात. संगीत खुर्ची बरोबरच बंजारा नृत्य देखील या ठिकाणी आपल्याला पाहायला मिळते. नाश्ता जेवण विविध प्रकारच्या राईड यामुळे रत्नाई शिवारला तुम्ही देखील अवश्य भेट द्या असेच आवाहन सिद्धाराम गुंगे यांनी केले आहे.