उच्च व तंत्र शिक्षण मंत्री चंद्रकांत पाटील येणार…
10 हजार 955 विद्यार्थ्यांना पदवी प्रदान होणार…
89 संशोधकांना पीएच. डी पदवी तर 59 सुवर्णपदकाचेही वितरण होणार…
सोलापूर- पुण्यश्लोक अहिल्यादेवी होळकर सोलापूर विद्यापीठाचा 21 वा दीक्षांत समारंभ गुरुवार, दि. 18 सप्टेंबर 2025 रोजी सकाळी अकरा वाजता विद्यापीठाच्या दीक्षांत मैदानात होणार असून यावेळी एकूण 10 हजार 955 विद्यार्थ्यांना पदवी प्रदान करण्यात येणार असल्याची माहिती कुलगुरू प्रा. डॉ. प्रकाश महानवर यांनी सोमवारी पत्रकार परिषदेत दिली. याचबरोबर 89 संशोधक विद्यार्थ्यांना पीएच. डी पदवी तर 59 विद्यार्थ्यांना सुवर्णपदके देऊन सन्मानित करण्यात येणार असल्याचेही त्यांनी सांगितले.
या दीक्षांत समारंभास राज्याचे उच्च व तंत्र शिक्षणमंत्री मंत्री चंद्रकांत पाटील, गोवा उच्च शिक्षण परिषदेचे उपाध्यक्ष डॉ. गोपाल मुगेरया हे प्रमुख अतिथी म्हणून उपस्थित राहणार आहेत. यावेळी या मान्यवरांच्या हस्ते विद्यार्थ्यांना पदवी प्रदान होणार आहे. गुरुवारी, सकाळी साडेदहा वाजता प्रशासकीय इमारतीपासून ते दीक्षांत मंडपापर्यंत दीक्षांत मिरवणूक निघणार आहे. परीक्षा व मूल्यमापन मंडळाचे संचालक डॉ. श्रीकांत अंधारे हे ज्ञानदंड हाती घेऊन मिरवणुकीच्या अग्रभागी असणार आहेत. त्यानंतर प्रत्यक्ष कार्यक्रमाला सुरुवात होईल. या समारंभात वाणिज्य व व्यवस्थापन विद्याशाखा, मानवविज्ञान विद्याशाखा, आंतर विद्याशाखा, विज्ञान व तंत्रज्ञान विद्याशाखेच्या विद्यार्थ्यांना पदवी देऊन सन्मानित करण्यात येईल.
यावर्षी 89 विद्यार्थ्यांना पीएच.डी पदवी प्रदान केली जाणार आहे. त्याचबरोबर यंदा 59 विद्यार्थी सुवर्णपदकाचे मानकरी ठरले आहेत. विविध विषयात गुणानुक्रमे प्रथम आलेल्या विद्यार्थ्यांना देणगीदारांनी दिलेल्या रकमेतून सुवर्णपदक देऊन त्यांचा यथोचित सन्मान केला जातो. अशा एकूण 59 विद्यार्थ्यांना सुवर्णपदक देऊन सन्मानित केले जाणार आहे. यामध्ये 15 मुले तर 44 मुलींचा समावेश आहे.
दीक्षांत समारंभाचा कार्यक्रम झाल्यानंतर महाविद्यालयांना पदवी प्रमाणपत्र वाटप केले जाणार आहे. यासाठी विद्यापीठ परीक्षा विभागाने खास सोय केलेली आहे. दीक्षांत समारंभासाठी पदवी ग्रहण करणारे स्नातक, अधिष्ठाता, मान्यवरांना बाराबंदीचा पोशाख राहणार आहे. गळ्यात उपरणे देखील राहणार आहे. सुवर्णपदके पटकावणाऱ्यांमध्ये मुलींची संख्या अधिक आहे.
या पत्रकार परिषदेस प्र-कुलगुरू प्रा. लक्ष्मीकांत दामा, प्रभारी कुलसचिव डॉ. अतुल लकडे परीक्षा व मूल्यमापन मंडळाचे संचालक डॉ. श्रीकांत अंधारे, वित्त व लेखाधिकारी सीए महादेव खराडे आदी उपस्थित होते.
