भारती विद्यापीठा अंतर्गत अभिजीत कदम इन्स्टिट्यूट ऑफ मॅनेजमेंट अँड सोशल सायन्सेस सोलापूरच्या शैक्षणिक वर्ष 2023- 24 च्या वार्षिक अहवालाचे प्रकाशन येस न्यूज मराठीचे संपादक शिवाजी सुरवसे यांच्या हस्ते करण्यात आले.
कार्यक्रमाच्या सुरुवातीला इन्स्टिट्यूट चे संचालक प्रा. डॉ. एस बी सावंत यांनी प्रमुख पाहुणे शिवाजी सुरवसे यांचे स्वागत केले व आपल्या स्वागत पर भाषणात इन्स्टिट्यूट मध्ये राबविण्यात येणाऱ्या विविध उपक्रमांची माहिती दिली तसेच भारती विद्यापीठाचा चढता आलेख सांगितला. प्रमुख पाहुणे शिवाजी सुरवसे यांनी आपल्या भाषणामध्ये सोलापूरला परत गतवैभव मिळवून देण्याची जबाबदारी ही सोलापुरातील सर्व नागरिकांची असल्याचे सांगितले व त्यासाठी भारती विद्यापीठाने योगदान देणे महत्त्वाचे असल्याचे सांगितले. सोलापुरात लवकरच विमानसेवा सुरू होईल व त्याचा नक्कीच उद्योग वाढीसाठी फायदा होईल असे त्यांनी सांगितले.
सोलापुरातील प्रस्तावित आयटी पार्क तसेच नवीन येणाऱ्या इंडस्ट्रीज यामुळे सोलापुरातील विद्यार्थ्यांना सोलापुरातच चांगली नोकरी मिळेल व सोलापूरची आर्थिक प्रगती होईल असे सांगितले. भारती विद्यापीठ हे एक जागतिक दर्जाची संस्था असून भारती विद्यापीठाच्या माध्यमातून बाहेर पडणारे विद्यार्थी हे भारतातच नाही तर भारताबाहेरही मोठ्या पदावर कार्यरत असल्याचे गौरव उद्गार श शिवाजी सुरवसे यांनी सांगितले.
या कार्यक्रमाचे सूत्रसंचालन उपप्राचार्य डॉ. पी. पी. कोठारी यांनी केले तर आभार प्रदर्शन एमबीए विभाग प्रमुख प्रा. सीआर सूर्यवंशी यांनी मानले. यावेळी एमसीए विभाग प्रमुख डॉ. एम के पाटील व इतर प्राध्यापक वर्ग उपस्थित होते. हा वार्षिक अहवाल करण्यासाठी डॉ. राहुल मांजरे तसेच तेजस्विनी राठोड चेतन लामानी व रीहान शेख या विद्यार्थ्यांनी विशेष परिश्रम घेतले.
