रमजानचे रोजे सुरू झाल्यामुळे कलिंगड, टरबूज, पपईच्या भावात वाढ

सोलापूर, दि.16- रमजानचे रोजे सुरू झाल्यामुळे मागणीत वाढ झाली असून कलिंगड टरबूज आणि पपई च्या भावात काहीशी वाढ झाल्याचे राणी लक्ष्मीबाई मंडईतील फळविक्रेते माजिद जमादार यांनी शुक्रवारी सांगितले. संचारबंदी लागू केल्याच्या बातमीनंतर एक दिवस मंडई मध्ये भरपूर गर्दी होती आणि ग्राहकांनी खरेदी ही मोठ्या प्रमाणावर केल्याचे जमादार यांनी सांगितले . मात्र गेल्या दोन दिवसापासून मंडईत येणाऱ्या ग्राहकांमध्ये घट झाली असल्याचेही जमादार यांनी स्पष्ट केले. कलिंगड, खरबूज, पपई या फळांच्या गेल्या आठवड्यामध्ये २० टनाच्या पाच ते सहा गाड्या दररोज येत होत्या. मात्र या आठवड्यात टेम्पोमधून कमी प्रमाणात माल येत असल्याचे जमादार यांनी सांगितले. बाजार समितीत होणारी आवक कमी आणि ग्राहकांची मागणी जास्त यामुळे दरांमध्ये वाढ झाल्याचे जमादार म्हणाले. मोठे कलिंगड साधारण 80 ते 100 रुपये पपई 40 ते 60 रुपये आणि खरबूज तीस ते पन्नास रुपये असे दर असल्याचे त्यांनी स्पष्ट केले.