मुंबई : अखिल भारतीय मराठी नाट्य परिषदेचे नवनिर्वाचीत अध्यक्ष प्रशांत दामले यांनी नुकतीच मुख्यमंत्री एकनाथ शिंदे यांची भेट घेतली आहे. त्यांच्या भेटीचे फोटो सोशल मीडियावर व्हायरल होत आहेत. एखाद्या राजकीय निवडणुकीप्रमाणेच अखिल भारतीय मराठी नाट्य परिषदेच्या पंचवार्षिक निवडणुकीचं राजकारण रंगलं होतं. अखेर या निवडणुकीत प्रशांत दामले यांनी बाजी मारली असून नाट्यपरिषदेच्या निवडणुकीची रणधुमाळी आता संपली आहे. अध्यक्षपदी निवड झाल्यानंतर प्रशांत दामलेंनी आता मुख्यमंत्री एकनाथ शिंदेंची सदिच्छा भेट घेतली आहे.
प्रशांत दामले यांनी घेतली मुख्यमंत्र्यांची भेट
अखिल भारतीय मराठी नाट्य परिषदेच्या अध्यक्षपदी विराजमान झाल्यानंतर प्रशांत दामले यांनी मुख्यमंत्री एकनाथ शिंदे यांचीदेखील भेट घेतली आहे. यावेळी अजित भुरे यांच्यासह नव्या कार्यकारिणीचे सदस्यदेखील उपस्थित होते. दरम्यान मुख्यमंत्र्यांनी दामले यांचं अभिनंदन केलं. अध्यक्षपदी विराजमान झाल्यानंतर प्रशांत दामले म्हणाले होते,”आताचं सरकार हे ऐकणारे सरकार आहे”. मुख्यमंत्री एकनाथ शिंदे यांच्यासह राष्ट्रवादी कॉंग्रेसचे अध्यक्ष शरद पवार यांची देखील प्रशांत दामले भेट घेणार आहेत. शरद पवार अखिल भारतीय मराठी नाट्य परिषदेचे तहहयात विश्वस्त आहेत. त्यामुळे आता अध्यक्षपदी निवड झाल्यानंतर ते शरद पवारांचीदेखील सदिच्छा भेट घेणार आहेत.
