येस न्युज मराठी नेटवर्क । मुंबई : अनेक दिवसांच्या प्रतीक्षेनंतर अखेर गेल्या महिन्यात 26 जानेवारी रोजी nCore गेम्सने FAU-G हा बॅटल गेम लाँच केला. लाँचिंगनंतर अवघ्या 24 तासात या गेमने एक नवा रेकॉर्ड प्रस्थापित केला. 24 तासांत गुगल प्ले स्टोरवरुन तब्बल 1 मिलियन (10 लाख) युजर्सने हा गेम डाऊनलोड केला. आतापर्यंत 5 मिलियन्स (50 लाख) युजर्सनी हा गेम डाऊनलोड केला आहे. दरम्यान हा गेम लाँच झाल्यानंतर मोठ्या संख्येने युजर्सनी हा गेम डाऊनलोड केला खरा परंतु त्यांचा आता चांगलाच हिरमोड झाला असल्याचे पाहायला मिळत आहे.
हा गेम युजर्सना आवडला नसल्याचे चित्र सध्या पाहायला मिळत आहे. युजर्स आणि पबजी प्लेयर्स या गेमला गुगल प्ले स्टोरवर निगेटिव्ह रिव्ह्यू देत आहेत. या गेमला मोठ्या प्रमाणात निगेटिव्ह रिव्ह्यूज मिळाले आहेत, त्यामुळे या गेमचं गुगल प्ले स्टोरवरील रेटिंग घसरलं आहे. या गेमला सुरुवातीला 4.7 स्टार्स रेटिंग मिळालं होतं. परंतु आता या गेमला गुगल प्ले स्टोरवर सरासरी 3.0 स्टार्स रेटिंग मिळालं आहे. पबजी प्लेयर्सना हा गेम आवडलेला नाही. त्यामुळे त्यांनी या गेमला निगेटिव्ह रिव्ह्यू दिलेत सोबत त्याला 1 स्टार मार्क केलं आहे.
