येस न्युज मराठी नेटवर्क : राष्ट्रीय महामार्ग प्राधिकरण येत्या पाच वर्षांत महामार्गांचं खासगीकरण करून एक लाख कोटी रुपये उभारण्याच्या योजनेवर काम करत आहे, अशी माहिती केंद्रीय रस्ते आणि वाहतूक मंत्री नितीन गडकरी यांनी दिली. तसेच उद्योगांना या बाबतीत पुढे येऊन गुंतवणूक करून त्याचा फायदा घेण्यास सांगितले.
बाजारपेठेतून एक लाख कोटी रुपये उभे करण्याची योजना
राष्ट्रीय महामार्गांच्या खासगीकरणामुळे प्रगतीचा वेग वाढणार आहे आणि हा निधी मजबूत पायाभूत सुविधांच्या विकासांसाठी वापरला जाऊ शकतो, असे रस्ते वाहतूक आणि महामार्ग मंत्री नितीन गडकरी म्हणाले. सीआयआयच्या एका कार्यक्रमात त्यांनी हे विधान केलेय. एनएचएआय पुढील पाच वर्षांत टोल वसुली आणि राष्ट्रीय महामार्गांच्या हस्तांतरणाद्वारे बाजारपेठेतून एक लाख कोटी रुपये उभे करण्याची योजना आखत आहे.
महामार्ग भाड्याने देण्यात येणार
नितीन गडकरी मंत्री म्हणाले की, बाजारात मालमत्ता विक्री किंवा लीज (Sale or lease) ही उद्योगांसाठी चांगली व्यवसाय संधी आहे. तसेच दुसरीकडे सरकारला पायाभूत सुविधांमध्ये केलेल्या गुंतवणुकीचे मूल्य काढण्यास मदत मिळणार आहे. ते उद्योग तसेच सरकारसाठी फायदेशीर आहे, असे ते म्हणाले. यामुळे देशातील पायाभूत सुविधांना चालना मिळण्यास मदत होईल.
इन्फ्रा क्षेत्रातील गुंतवणुकीला वेग येणार
NHAI ला सार्वजनिक अनुदानित राष्ट्रीय महामार्ग प्रकल्पांना बाजारपेठेत खासगीकरण करण्यासाठी अधिकृत करण्यात आलेय. जे महामार्ग किमान एक वर्षापासून चालू आहेत आणि जेथे टोलवसुली केली जात आहे. राष्ट्रीय संपत्ती बाजारात आणण्याची योजना हा एक महत्त्वाचा उपक्रम होता. पायाभूत क्षेत्रात दीर्घकालीन गुंतवणुकीसाठी ही एक चांगली संधी आहे.
