जलतरणपटूंना आधुनिक सुविधा उपलब्ध करून देण्याचे आश्वासन
सोलापूर – शहरातील श्री मार्कंडेय जलतरण तलावाच्या दुरावस्थेबाबत जलतरणपटू, त्यांचे पालक व सभासदांनी सोलापूर लोकसभा मतदारसंघाच्या खासदार प्रणिती शिंदे यांची भेट घेऊन विविध अडचणी मांडल्या. या तक्रारींची तात्काळ दखल घेत खासदार प्रणिती शिंदे यांनी श्री मार्कंडेय जलतरण तलाव येथे भेट देऊन प्रत्यक्ष परिस्थितीची पाहणी केली. यावेळी त्यांनी जलतरणपटू, प्रशिक्षक, पालक, सभासद आणि संबंधित नागरिकांशी संवाद साधून तलावातील समस्या जाणून घेतल्या.
जलतरणपटूंनी स्वच्छतागृहांची दुरावस्था, चेंजिंग रूमची खराब अवस्था, रंगरंगोटीची आवश्यकता, काही बाथरूमला दरवाजे नसणे, फुटलेल्या टाईल्स, सोलर सिस्टीमची गरज, पार्किंग परिसराचे काँक्रिटीकरण, प्रेक्षक गॅलरीसाठी शेड उभारणे आदी समस्या मांडल्या. तसेच जलतरण तलावातील वाढीव दर रद्द करून पूर्वीप्रमाणे वार्षिक, पंचवार्षिक आणि दशवार्षिक पास योजना सुरू करण्यात याव्यात, अशी मागणीही यावेळी करण्यात आली. लवकरच राज्यस्तरीय स्पर्धा होणार असून उन्हाळी सुट्टीमुळे अनेक शिकाऊ विद्यार्थी जलतरण तलावात येत असल्याने खेळाडूंना सराव करताना मोठ्या अडचणींचा सामना करावा लागत असल्याचेही पालकांनी सांगितले.
यावेळी खासदार प्रणिती शिंदे यांनी सोलापूर शहरातील होतकरू जलतरणपटूंना अधिक चांगल्या सुविधा, दर्जेदार प्रशिक्षण आणि प्रोत्साहन मिळावे यासाठी आवश्यक उपाययोजना करण्याबाबत सकारात्मक भूमिका घेतली. श्री मार्कंडेय जलतरण तलावातील दुरावस्था दूर करण्यासाठी आवश्यक निधी उपलब्ध करून देण्यात करण्यात येईल, असे त्यांनी सांगितले. युवकांना राज्यस्तरीय, राष्ट्रीय व आंतरराष्ट्रीय स्तरावर संधी उपलब्ध करून देण्यासाठी शहरात आधुनिक क्रीडा सुविधा उभारण्यावर भर देणार असल्याचेही त्यांनी स्पष्ट केले.
