विधान परिषद निवडणूक : मतपत्रिकेवर चिन्ह नसणार.. क्रॉस व्होटिंग झाल्यास कळणार नाही..

विधान परिषद निवडणुकीसाठी सोलापूर मतदारसंघातील सर्व प्रशासकीय प्रक्रिया पूर्ण झाली असून 17 जून रोजी अंतिम ट्रेनिंग देऊन सर्व साहित्यसह मतदान केंद्रावर पाठविण्यात येणार आहे. कुर्डूवाडी आणि अकलूज प्रांत कार्यालय, तसेच उत्तर सोलापूर, दक्षिण सोलापूर,पंढरपूर आणि मंगळवेढा तहसील कार्यालय अशा सहा ठिकाणी मतदान करता येणार आहे. महापालिका,नगरपालिका आणि जिल्हा परिषद सदस्य असे एकूण 616 मतदार असून त्यांना निवडणूक आयोगाने दिलेले मतदान ओळखपत्र किंवा जिल्हा परिषद, महापालिका आणि नगरपालिकेने दिलेले ओळखपत्र हे दोनच पुरावे ग्राह्य धरले जाणार आहेत. मतदान केंद्राच्या 100 मीटर परिसरात मोबाईल तसेच पेन आणि कोणतेही इलेक्ट्रॉनिक गॅजेट वापरता येणार नाही. सोलापूर मतदार संघासाठी दोन उमेदवार असून मतपत्रिकेवर पसंती क्रमांक एक हा टाकावाच लागेल. अक्षरा ऐवजी मराठी,इंग्रजी आणि रोमन लिपी मध्ये पैकी कोणत्याही एका भाषेत एक हा आकडा निवडणुका आयोगाने दिलेल्या जांभळ्या पेनने लिहावा लागेल. अशी माहिती सोलापूरचे जिल्हाधिकारी एस कार्तिकयेन यांनी पत्रकार परिषदेत दिली. एक हा आकडा दोन वेळा लिहिणे,खडाखोड करणे तसेच एक आकडा न टाकता फक्त दोन हा आकडा टाकने किंवा मतपत्रिकेवर काहीही लिहिल्यास ते मत बाद ठरविले जाणार आहे. कोणत्या मतदान केंद्रावर क्रॉस व्होटिंग झाले हे कळते का याबाबत प्रश्न विचारल्यावर जिल्हाधिकारी म्हणाले मतमोजणी करताना 22 जून रोजी सर्व मतदान केंद्रावरील मते एकत्र केली जाणार आहेत. कोणती मतपत्रिका कोणत्या केंद्रावरील आहे तसेच कोणत्या मतदान केंद्रात कोणी क्रॉस वोटिंग केले हे अजिबात कळणार नाही असेही जिल्हाधिकारी म्हणाले.