जनता बँक कर्मचारी सांस्कृतिक मंडळातर्फे २० सप्टेंबरपासून बौद्धिक व्याख्यानमाला, हत्तीवरून काढली जाणार गणपतीची मिरवणूक
सोलापूर- गणेशोत्सवानिमित्त जनता बँक कर्मचारी सांस्कृतिक मंडळ आणि सोलापूर जनता सहकारी बँक यांच्यावतीने २० सप्टेंबर ते २३ सप्टेंबर दरम्यान दररोज सायं. ६.३० वाजता हुतात्मा स्मृती मंदिरात बौद्धिक व्याख्यानमालेचे आयोजन करण्यात आल्याची माहिती मंडळाचे अध्यक्ष मल्लिनाथ खुने यांनी शनिवारी पत्रकार परिषदेत दिली. मंडळाचे यंदा सुवर्ण महोत्सवी अर्थात ५० वे वर्ष आहे.
जनता बँक कर्मचारी सांस्कृतिक मंडळातर्फे सोमवारी दि.१४ चार हुतात्मा चौकातून ‘श्रीं’ ची भव्य मिरवणूक काढण्यात येणार आहे. या मिरवणुकीचे उदघाटन पोलिस आयुक्त एम. राजकुमार यांच्या हस्ते श्रींचे पूजन करून करण्यात येणार आहे. या मिरवणुकीत बँकेच्या १०० कर्मचाऱ्यांचे लेझीम पथक, हत्तीची प्रतिकृती यांचा समावेश असणार आहे. तसेच मंगळवारी दि. १५ सकाळी ९ वाजता अथर्वशीर्ष पठण करण्यात येणार आहे.
व्याख्यानमालेचे उद्घाटन रविवारी दि. २० सायंकाळी ६.३० वाजता जिल्हा पोलिस अधिक्षक अतुल कुलकर्णी यांच्या हस्ते होणार आहे. यावेळी कार्यक्रमाचे अध्यक्ष सुनील पेंडसे राहतील. व्याख्यानमालेच्या उद्घाटनाच्या दिवशी महाराष्ट्रातील समृद्ध पण लोप पावत चाललेली लोककला ‘फोक प्रबोधन’ या नावाने तीन तासांचा कार्यक्रम सादर करण्यात येणार आहे. यावेळी विविध लोकगीते, वाद्यांचे सादरीकरण होणार आहे. सोमवारी दि. २१ शरद पोंक्षे यांचे ‘आजची युवा पिढी व भारत’ या विषयावर व्याख्यान होणार आहे.
मंगळवारी दि. २२ ज्येष्ठ आणि सुप्रसिद्ध गायक श्रीधर फडके यांचा ‘बाबूजी व मी’ हा भावगीत, भक्तीगीत व चित्रपट गीतांचा कार्यक्रम सादर होणार आहे. तर बुधवारी दि.२३ सुशील कुलकर्णी यांचे ‘आजचा खरा जेन झी’ या विषयावर व्याख्यान होणार आहे.
बौद्धिक व्याख्यानमालेतील प्रत्येक कार्यक्रम दररोज ठीक सायंकाळी ६.३० वाजता सुरू होणार असून बँकेच्या सर्व ग्राहक, सभासद, हितचिंतक आणि सोलापूरकर रसिकांनी या कार्यक्रमांना वेळेवर उपस्थित रहावे, असे आवाहन अध्यक्ष मल्लिनाथ खुने यांनी केले.
गणेशोत्सव काळात दररोज शहर जिल्ह्यातील मान्यवरांच्या हस्ते गणपती बाप्पांची पूजा करण्यात येणार आहे.
या पत्रकार परिषदेस बँकेचे अध्यक्ष सुनील पेंडसे, संचालक पुरुषोत्तम उडता, संचालिका चंद्रिका चौहान, गौरी आमडेकर, सुरेश चिक्कळी, महादेव न्हावकर, विष्णू मोंढे, ऍड. मल्लिनाथ शहाबादे, बोर्ड ऑफ मॅनेजमेंटचे सदस्य प्रल्हाद कणसावी, सरव्यवस्थापक मकरंद जोशी, सरव्यवस्थापक देवदत्त पटवर्धन, मुख्य जनसंपर्क अधिकारी मदन मोरे, जनता बँक कर्मचारी सांस्कृतिक मंडळाचे अध्यक्ष मल्लिनाथ खुने, सचिव सिद्धार्थ गनगोंडा, उपाध्यक्ष अनिल बरगले, सहसचिव पवन रणसुभे, खजिनदार विनायक कुरापाटी उपस्थित होते.
वर्षभर सांस्कृतिक आणि सामाजिक कार्यक्रमांची मेजवानी– जनता बँक कर्मचारी सांस्कृतिक मंडळाच्या यंदाच्या ५० व्या वर्षानिमित्त महाराष्ट्रातील विविध जिल्ह्यांमध्ये वर्षभर सांस्कृतिक आणि सामाजिक कार्यक्रमांचे तसेच राज्यस्तरीय, राष्ट्रीय स्तरावरील क्रीडा स्पर्धांचे आयोजन करण्यात येणार आहे. त्यानिमित्ताने बँकेच्या ग्राहक हितचिंतक रसिकांना उत्तमोत्तम कार्यक्रमांची मेजवानी मिळेल, असे मंडळाचे अध्यक्ष मल्लिनाथ खुने यांनी सांगितले.
