सोलापुर – हिंदू नववर्ष अर्थात गुढीपाडव्याच्या निमित्ताने गुरुवार दि. १९ मार्च २०२६ रोजी सोलापूर शहरात पाच ठिकाणी भव्य शोभायात्रांचे आयोजन करण्यात आले आहे. हिंदू नववर्ष महोत्सव समितीच्या वतीने शहरातील तीन ठिकाणी दुपारी आणि दोन ठिकाणी सकाळी शोभायात्रा काढण्यात येणार असल्याची माहिती संस्थापक रंगनाथ बंग, अध्यक्ष पेंटप्पा गड्डम व कार्यवाह ज्ञानेश्वर म्याकल यांनी दिली.
बाळीवेस येथील विजयी चौकातून दुपारी ४.३० वाजता भव्य शोभायात्रा निघणार असून त्यात सजीव देखावे, रामलल्ला दर्शन, छत्रपती शिवाजी महाराजांची प्रतिकृती, ढोल-लेझीम पथक आणि भारतमाता रथ असणार आहे.जुळे सोलापूर येथे किल्लेदार मंगल कार्यालयातून दुपारी ४.३० वाजता शोभायात्रा निघेल. तसेच अक्कलकोट रोडवरील मल्लिकार्जुन नगर येथे सायंकाळी ५.३० वाजता शोभायात्रा काढण्यात येणार आहे.
गुढीपाडव्याच्या दिवशी घरासमोर रांगोळी काढून, भगवा ध्वज लावून आणि गुढी उभारून नववर्षाचे स्वागत करावे तसेच शोभायात्रेत मोठ्या संख्येने सहभागी व्हावे, असे आवाहन समितीच्या वतीने करण्यात आले.
