सोलापूर – सोलापूर महानगरपालिकेच्या सार्वत्रिक निवडणुकांकरिता प्रभाग रचना प्रक्रियेत आज एक महत्त्वाचा टप्पा पार पडला. मा. राज्य निवडणूक आयोगाच्या आदेशानुसार ३ सप्टेंबर २०२५ रोजी शासन राजपत्रात प्रसिद्ध झालेल्या प्रारूप प्रभाग रचनेवर नागरिकांकडून आलेल्या हरकती व सूचनांवर सुनावणी आज (दि. १९ सप्टेंबर) जिल्हा नियोजन भवन, सोलापूर येथे घेण्यात आली.
या सुनावणीवेळी एकूण ३८ हरकती व सूचना प्राप्त झाल्याचे समोर आले. त्यापैकी ३६ हरकतींवर सुनावणी झाली असून २ अर्जदार अनुपस्थित राहिले. सुनावणीची अध्यक्षता जिल्हाधिकारी कार्यालयातर्फे करण्यात आली, यावेळी मोनिका सिंह, अप्पर जिल्हाधिकारी उपस्थित होत्या.
अप्पर जिल्हाधिकारी मोनिका सिंह यांनी माहिती देताना सांगितले की, प्राप्त झालेल्या सर्व हरकती व सूचना या मा. जिल्हाधिकारी यांच्याकडे सादर करण्यात येणार असून, निवडणूक आयोगाने दिलेल्या निर्देशांप्रमाणे पुढील कार्यवाही केली जाईल.
या सुनावणी प्रसंगी सहायक नगर रचना संचालक मनिष भिष्णुरकर, सहायक आयुक्त गिरीष पंडित, तहसीलदार सरस्वती पाटील, विभागीय अधिकारी महेश क्षीरसागर, कार्यालय अधीक्षक ओमप्रकाश वाघमारे, कामगार कल्याण अधिकारी अजित खानासूळे निर्मलकुमार शितोळे, दवीत शिरशेट्टी, गणेश कोळी यांच्यासह संबंधित अधिकारी उपस्थित होते.
महापालिकेच्या सार्वत्रिक निवडणुकीसंदर्भातील अंतिम प्रभाग रचना २३ ते २९ सप्टेंबर २०२५ या कालावधीत निश्चित करून नगर विकास विभागामार्फत मा. राज्य निवडणूक आयोगाकडे पाठविण्यात येणार आहे. त्यानंतर ९ ते १३ ऑक्टोबर २०२५ दरम्यान अंतिम अधिसूचना शासन राजपत्रात प्रसिद्ध होणार आहे.
