चैनीची सवय लागलेल्या बी टेक शिक्षण घेणाऱ्या एका विद्यार्थ्याने मित्रांच्या मदतीने स्वतःच्याच घरात दरोडा टाकून 10 तोळे सोने लंपास केल्याची धक्कादायक घटना पोलिसांनी उघडकीस आणली आहे.
वीस वर्षीय भावेश नेरकर असे विद्यार्थ्याचे नाव असून पोलिसांनी त्याला अटक केली आहे.ही घटना साक्री येथे घडली असून पेरेजपूर रोडवरील सुयोग कॉलनी येथे राहणारा भावेश नेरकर याने साक्री पोलिसात घरपोडीची फिर्याद दिली होती.30 नोव्हेंबर रोजी सायंकाळी सहा ते सातच्या दरम्यान भावेश आणि त्याची आई बाहेर नातेवाईकांकडे गेले असताना चोरट्यांनी घर फोडून दहा तोळे, दोन ग्रॅम वजनाचे सोन्याचे दागिने लंपास केल्याचे त्यानेच तक्रारीत नमुद केले होते.
पोलिसांनी या घटनेचा पर्दाफाश करत ही हाय प्रोफाईल चोरी उघडकीस आणली.
बी टेक चे शिक्षण घेत असताना भावेशला झगमगाट आणि मौजमजेच्या जीवनशैलीची सवय जडली. पैशाची कमतरता भासू लागल्याने त्याने दोन साथीदारांच्या मदतीने स्वतःच्याच घरात चोरी करण्याचा कट रचला. योजनेनुसार ठरलेल्या वेळी आईला बाहेर घेऊन गेल्यानंतर त्याने साथीदारांकडून स्वचःचेच घर फोडून सोने चोरले.त्यापैकी दोन तोळे सोने भावेशने एका सराफाला विकून उरलेले सोने शेतात पुरून ठेवले होते.पोलिसांनी या तिघांनाही ताब्यात घेतले असून त्यांच्याकडून चोरीचा सर्व मुद्देमाल हस्तगत केला आहे.
