सोलापूर – अंध भारतीय महिला क्रिकेट क्षेत्रात भारताचे नाव जागतिक पातळीवर उज्ज्वल करणाऱ्या भारतीय अंध महिला क्रिकेट संघाच्या उपकर्णधार गंगा कदमचा आज इलिझियम क्लब – जामश्री सोलापूरच्या सदस्यांकडून डॉ. रोहिणी देशपांडे यांच्या शुभ हस्ते भेट वस्तू देऊन सत्कार करण्यात आला. त्यांच्या अथक परिश्रम, जिद्द आणि नेतृत्वगुणांच्या बळावर अंध महिला विश्वचषक भारतात आणण्यात तिने मोलाची भूमिका बजावली आहे. या अभिमानास्पद कामगिरीबद्दल क्लबतर्फे तिचे मन:पूर्वक अभिनंदन करण्यात आले.
गंगा कदमच्या यशामागे तिचे प्रशिक्षक अनिल सांब्राणी यांचेही मोठे योगदान आहे. या प्रसंगी त्यांचा देखील सत्कार इलिझियम कल्बच्या सदस्यांच्या वतीने डॉ. दिलीप जोशी यांच्या शुभ हस्ते करण्यात आला. गंगांने सरावाची सुरुवात २०१६ पासून जामश्री क्रिकेट अकादमी येथून प्रशिक्षक अनिल सांब्राणी यांच्याकडून केली व सध्या ती जामश्री अंकित इलिझियम क्लब येथे सराव करत आहे . तिला जामश्रीचे व्यवस्थापकीय संचालक राजेश दमाणी व संतोष भंडारी यांचे मोलाचे सहकार्य लाभले.
यावेळी इलिझियम क्लबचे मेंटॉर राजीव देसाई, क्लब चे सभासद विजय जाधव, उदयशंकर चाकोते, राजेश नाईक, अ‍ॅड. दत्तात्रय अंबुरे, धनंजय हिरेमठ, मोहित मेहता, पार्थ शहा, प्रा. अतुल बाकळे आदी मान्यवर उपस्थित होते.
