यंदाच्या वर्षी 1972 पेक्षाही अधिक तीव्रतेचा दुष्काळ सोलापूर जिल्हा पाहणार आहे. दर तीन-चार वर्षांनी उजनी धरण भरत नाही असा अनुभव आहे. असे असले तरीही इथले आमदार खासदार आणि मंत्री 123 टीएमसी एवढा पाणी साठवण क्षमतेचा महाकाय प्रकल्प असलेल्या उजनी धरणाकडे दुर्लक्ष करतात. यंदाच्या वर्षी सोलापूर जिल्ह्यात 50% देखील पाऊस झाला नाही. उजनी धरण 100% भरले एवढेच नव्हे तर तब्बल 80 टीएमसी पाणी वाहून गेले. दोनच महिन्यापूर्वी भीमा नदीला पूर आला होता असा विश्वास देखील बसणार नाही. उजनी धरणा वरती जवळपास 18 बंधारी आहेत. त्याच्या खोलीकरणाकडे तसेच रुंदीकरणाकडे लक्ष दिले गेले नाही. उजनी धणात 20 टीएमसी एवढे पाणी साठत नाही कारण तेवढा गाळ भरला आहे.
उजनी धरणाच्या मूळ कालव्याच्या योजना अद्याप पूर्ण झाले नाहीत. त्यामुळे “तळे राखेल तो पाणी चाखेल” या म्हणीप्रमाणे काही ठराविक आमदारांची उजनी धरणावर मक्तेदारी आहे. 123 टीएमसी क्षमतेचे उजनी धरण उशाला आणि कोरड घशाला अशी जिल्ह्याची अवस्था आहे. एवढेच नव्हे तर ज्या माढा तालुक्यात हे उजनी धरण आहे त्याच तालुक्यातील तुळशी हे गाव पाणी मिळत नाही म्हणून गावकऱ्यांनी पाहण्यासाठीच विकायला काढले होते. 80 टीएमसी पाणी नदीतून वाहून गेले हे पाणी अडवण्यासाठी काहीही होत नाहीत हे दुर्दैव. अनेक साखळी बंधारे उजनी धरणाच्या अतिरिक्त पाण्याने भरून घेता आले असते. जो तो आमदार फक्त आपला मतदारसंघ पाहतोय. सर्व सिस्टीम व्यक्ति केंद्रित झाली आहे त्यामुळे उजनी धरण असून देखील जिल्ह्याचा सुमारे 60 टक्के भाग या पाण्यापासून वंचित आहे हे दुर्दैव. त्यामुळेच यंदाच्या वर्षी दुष्काळाच्या झळा 1972 च्या दुष्काळापेक्षा देखील अधिक गडद असतील हे नक्की. यावर कायमस्वरूपी उपाययोजना करण्याबाबत कोणीच प्रयत्न करताना दिसत नाही.
