सांगली – फेब्रुवारी २०२६ कास्ट्राईब कर्मचारी महासंघ, महाराष्ट्र राज्य, शाखा सांगली व संलग्न सर्व शाखांच्या वतीने आयोजित ‘भारतीय संविधान सन्मान अमृत महोत्सवी गौरव वर्ष २०२५-२६’ निमित्त द्वितीय पुणे विभागीय मेळावा सांगली येथे उत्साहात पार पडला. या मेळाव्यात संघटनात्मक, शैक्षणिक व सामाजिक क्षेत्रात उल्लेखनीय कार्य केल्याबद्दल पुण्यश्लोक अहिल्यादेवी होळकर सोलापूर विद्यापीठ येथील वरिष्ठ लिपिक डॉ. शिरीष अनिता शामराव बंडगर यांना ‘आदर्श कर्मचारी पुरस्कार’ प्रदान करण्यात आला.
कास्ट्राईब संघटनेचे राज्य कार्याध्यक्ष सन्मानीय गणेश मढावी यांच्या हस्ते हा सन्मान प्रदान करण्यात आला. डॉ. बंडगर यांनी आपल्या सेवाकाळात प्रामाणिकपणा, कार्यतत्परता व शिस्तबद्ध प्रशासनिक कामकाज यांद्वारे उल्लेखनीय ठसा उमटविला आहे. विद्यापीठातील दैनंदिन कामकाज सुरळीत ठेवणे, विद्यार्थ्यांशी व सहकाऱ्यांशी समन्वय राखणे तसेच संघटनात्मक कार्यात सक्रिय सहभाग घेणे या त्यांच्या कार्याची दखल घेऊन त्यांचा गौरव करण्यात आला.
संविधानिक मूल्यांप्रती निष्ठा, सामाजिक बांधिलकी आणि कर्मचारी हितासाठी सातत्याने केलेले प्रयत्न यामुळे डॉ. बंडगर यांची ‘आदर्श कर्मचारी’ म्हणून निवड करण्यात आली असल्याचे आयोजकांनी सांगितले.
या सन्मानाबद्दल विविध स्तरांतून त्यांचे अभिनंदन करण्यात येत असून, त्यांच्या कार्यामुळे इतर कर्मचाऱ्यांसाठी प्रेरणादायी आदर्श निर्माण झाला आहे.
