सोलापूर – क्रीडा व युवक सेवा संचालनालय महाराष्ट्र राज्य पुणे अंतर्गत जिल्हा क्रीडा अधिकारी कार्यालय व जिल्हा क्रीडा परिषद सोलापूर यांच्या संयुक्त विद्यमाने जिल्हास्तर युवा महोत्सवाचे आयोजन दिनांक 09 व 10 डिसेंबर 2025 रोजी करण्यात आले आहे.
राज्यात 2025-26 या वर्षात जिल्हा ते राष्ट्रीय स्तरापर्यंत युवा महोत्सवाचे आयोजन करण्यात आले असून युवकांचा सर्वांगीण विकास, संस्कृती व परंपरेचे जतन, सुप्त गुणांना वाव देणे तसेच राष्ट्रीय एकात्मता वृद्धिंगत करणे हा या उपक्रमाचा उद्देश आहे.
राष्ट्रीय युवा महोत्सवाचे आयोजन 12 ते 16 जानेवारी 2026 दरम्यान होणार असून यावर्षी विज्ञान व तंत्रज्ञान नवोपक्रम या संकल्पनेवर आधारित कार्यक्रम होणार आहे. यात 15 ते 29 वयोगटातील युवक-युवतींना सहभागी होता येणार असून प्राविण्य प्राप्त स्पर्धकांना शासनाकडून पारितोषिक व प्रमाणपत्र देण्यात येईल. प्रथम क्रमांक विजेत्यांची विभागस्तरावर निवड केली जाणार आहे. सहभागींच्या वयाची गणना 12 जानेवारी 2026 रोजी केली जाणार असून जन्मतारीख पुरावा म्हणून जन्म दाखला व सोलापूर जिल्ह्याचा रहिवासी असल्याचा पुरावा म्हणून आधारकार्ड जोडणे आवश्यक आहे.
सोलापूर जिल्ह्यातील संगीत महाविद्यालय, वरिष्ठ व कनिष्ठ महाविद्यालये, समाजकार्य, इंजिनिअरिंग, वैद्यकीय, कृषी महाविद्यालये तसेच औद्योगिक प्रशिक्षण संस्था यांतील विद्यार्थी व युवक-युवतींनी मोठ्या संख्येने सहभाग नोंदवावा, असे आवाहन जिल्हा क्रीडा अधिकारी श्रीकांत हरनाळे यांनी केले आहे.
स्पर्धा प्रकार व पारितोषिके –
- विज्ञान प्रदर्शन व समूह लोकगीत : ₹5000, ₹3000, ₹2000
- समूह लोकनृत्य : ₹7000, ₹5000, ₹3000
- कथालेखन, कविता लेखन, चित्रकला, वक्तृत्व : ₹3000, ₹2000, ₹1500
- स्पर्धा स्थळ व कालावधी:-
- कथा लेखन, कविता लेखन, चित्रकला : 9 डिसेंबर 2025, डी.पी.बी. दयानंद कॉलेज ऑफ एज्युकेशन, सोलापूर
- लोकनृत्य, लोकगीत, वक्तृत्व, विज्ञान प्रदर्शन : 10 डिसेंबर 2025, निर्मलकुमार फडकुले सभागृह, सोलापूर
सहभाग इच्छुकांनी आपले प्रवेश अर्ज दिनांक 08 डिसेंबर 2025 रोजी कार्यालयीन वेळेत जिल्हा क्रीडा अधिकारी कार्यालय, कुमठा नाका येथे सादर करावेत. विहित मुदतीनंतर आलेले अर्ज स्वीकारले जाणार नाहीत.
