सोलापूर : उपमहापौर राजेश काळे यांच्यावर खंडणी मागितल्याचा गुन्हा दाखल झाला होता. सोलापुरातील भाजपचे उपमहापौर राजेश काळे यांच्या विरोधात खंडणीचा गुन्हा दाखल झाला होता. सोलापूर महानगरपालिकेचे आयुक्त पी. शिवशंकर, उपायुक्त धनराज पांडे, विभागीय अधिकारी निलकंठ मठपती यांना अर्वाच्च भाषेत शिवीगाळ केल्याप्रकरणी गुन्हा दाखल झाला होता.
गुन्हा दाखल झाल्यापासून तब्बल ७ दिवस काळे फरार होते. त्यांना शहर गुन्हे शाखेच्या पोलिसांनी जुना तुळजापूर नाका येथे पाठलाग करून अटक केली आणि सदर बझार पोलीस ठाण्याकडे सुपुर्द केले त्यानंतर काळे यांना न्यायालयात उभे करण्यात आले.
महापालिका अधिकाऱ्यांना शिवीगाळ करून खंडणी मागितल्या प्रकरणी राजेश काळे यांना अटक करण्यात आली आहे. भाजपच्या नगरसेवकांनी काळे यांच्या हकालपट्टीची मागणी केली होती. शहराध्यक्ष विक्रम देशमुख यांनीही अहवाल पाठवला होता. पक्षाचे निरीक्षक मकरंद देशपांडे यांनी सोलापुरात येऊन या प्रकरणाची माहिती घेतली होती. त्यानंतर प्रदेशाध्यक्ष चंद्रकांत पाटील यांना अहवाल पाठवण्यात आला.
भाजपाचे प्रदेशाध्यक्ष चंद्रकांत पाटील यांनी उपमहापौर राजेश काळे यांची पक्षातून हकालपट्टी करण्याचा निर्णय घेतला आहे. वारंवार पक्षातील पदाधिकाऱ्यांनी केलेल्या तक्रारी आणि पक्षाची बिघडत चाललेली शिस्त आणि पक्ष हितास धोकादायक कृती केल्याचा ठपका त्यांच्यावर ठेवण्यात आला होता. काळे यांची पक्षातून हकालपट्टी करण्याचा निर्णय घेण्यात आला आहे व पत्र आजच प्राप्त झाल्याचे भाजपचे शहराध्यक्ष विक्रम देशमुख यांनी आजतक सोलापूरशी बोलताना सांगितले.
