सोलापूर शहर आणि जिल्ह्यात उद्यापासून म्हणजे 16 मे पासून राष्ट्रीय जनगणनेचे कार्य सुरू होणार आहे. परंतु आज 15 मे ची संध्याकाळ झाली तरी अद्यापही प्रगणकांना अथवा पर्यवेक्षकांना जनगणने संदर्भातील कोणतेही साहित्य उपलब्ध करून देण्यात आले नाही. याबाबत प्रशासनाकडे चौकशी केली असता साहित्य उपलब्ध नाही, काही प्रगणकांनाच साहित्य मिळेल असे सांगण्यात येत आहे. उद्या सकाळपासून जनगणना सुरू होणार असले तरी साहित्यच नसल्याने जनगणना कशी करायची? घरावर मार्किंग कसे करायचे? असे प्रश्न निर्माण झाले आहेत.
प्रशिक्षणामध्ये सर्व कीट 13 तारखेपर्यंत उपलब्ध करून देण्यात येईल असे सांगण्यात आले होते. परंतु जनगणनेच्या बाबतीत प्रशासनात कोणाचा पायपोस कोणाला अशी अवस्था झाली आहे. शिवाय शासन देखील उदासीन आहे असे जाणवत आहे. येत्या दोन दिवसात साहित्य उपलब्ध करून देऊ असे देखील सांगण्यात येत आहे. मग जनगणना नेमकी उद्या शनिवारपासून करायची की सोमवारपासून? दिलेल्या वेळेत जनगणना पूर्ण होईल का? असे प्रश्न शिक्षकांकडून विचारले जात आहेत. भरीस भर म्हणून HLO हे ऑफिशियल ॲप पण डाऊनलोड होत नाहीए, शिवाय ॲप इन्स्टाॅल झालं तरी पुढील प्रोग्राम्स ओपन होत नाहीएत.सातत्याने Invalid credentials, capcha does not match, असे एरर येत आहेत. प्रशासनाच्या या नियोजनशून्य कारभारामुळे सर्व शिक्षकांनी तीव्र संताप व्यक्त केला आहे. सोलापुरात एकंदरीत या जनगणनेचा पूर्णपणे बोजवारा उडाल्याचे चित्र आज दिसत आहे
