पुणे : गंजाम (ओडिशा) येथून सोलापूरच्या दिशेने मोठ्या प्रमाणात गांजाची वाहतूक होत असल्याची माहिती मिळाल्यानंतर पुणे कस्टम्सच्या नार्कोटिक्स सेलने कारवाई करत १ हजार ३०९.०२ किलो गांजा जप्त केला आहे. या प्रकरणी एका आरोपीस अटक करण्यात आली आहे.
पुणे कस्टम्सच्या अधिकाऱ्यांनी ६ ऑगस्ट २०२६ रोजी पुणे-सोलापूर महामार्गावर ही कारवाई केली. कारवाईदरम्यान MH-16-DK-5556 क्रमांकाचा ट्रक संशयितरीत्या आढळून आला. ट्रकची तपासणी केली असता प्लास्टिक क्रेट्समध्ये लपवून गांजाची वाहतूक केली जात असल्याचे समोर आले.
तपासणीमध्ये ४६ गोण्यांमधून गांजाची ६३६ पाकिटे आढळून आली. या गांजाचे एकूण वजन १३०९.०२ किलो असून, त्याची अंदाजे किंमत ६ कोटी ५४ लाख रुपये असल्याचे कस्टम्सने सांगितले.
ही कारवाई NDPS Act, 1985 मधील संबंधित तरतुदींनुसार करण्यात आली आहे. या प्रकरणातील एका आरोपीस अटक करून त्याला न्यायालयात हजर करण्यात आले असून, पुढील तपासासाठी त्याची पोलीस कोठडी सुनावण्यात आली आहे.
गांजाची ही मोठी खेप नेमकी कोणासाठी आणि कुठे नेली जात होती, या मागील मुख्य सूत्रधार कोण आहेत, याचा तपास पुणे कस्टम्सकडून सुरू आहे.
