सोलापूर : बँक कर्मचाऱ्यांच्या प्रस्तावित देशव्यापी संपाच्या पार्श्वभूमीवर ग्राहकांची गैरसोय टाळण्यासाठी रविवार, २७ सप्टेंबर २०२६ रोजी सार्वजनिक क्षेत्रातील बँका आणि प्रादेशिक ग्रामीण बँका सुरू ठेवण्याचा निर्णय घेण्यात आला आहे. रिझर्व्ह बँक ऑफ इंडियानेही संबंधित बँक शाखा, कार्यालये, एटीएमशी संबंधित शाखा आणि चलन तिजोऱ्या सुरू ठेवण्यास मंजुरी दिली आहे.
युनायटेड फोरम ऑफ बँक युनियन्सने (UFBU) २८ ते ३० सप्टेंबरदरम्यान तीन दिवसांचा देशव्यापी संप पुकारला आहे. त्यापूर्वी २६ सप्टेंबरला चौथा शनिवार आणि २७ सप्टेंबरला रविवार असल्याने बँकिंग व्यवहारांवर सलग अनेक दिवस परिणाम होण्याची शक्यता होती. त्यामुळे रविवारी बँका सुरू ठेवण्याचा निर्णय घेण्यात आला आहे.
बँक कर्मचाऱ्यांच्या प्रमुख मागण्यांमध्ये पाच दिवसांचा बँकिंग आठवडा लागू करणे याचा समावेश आहे. सरकारच्या माहितीनुसार परफॉर्मन्स लिंक्ड इन्सेंटिव्ह (PLI) योजनेबाबतही संघटनांनी आक्षेप घेतला होता; मात्र सरकारने PLI योजना सध्या स्थगित ठेवली आहे. त्यानंतर पाच दिवसांचा बँकिंग आठवडा ही प्रमुख प्रलंबित मागणी असल्याचे सरकारने नमूद केले आहे.
संपाच्या काळात शाखास्तरीय कामकाजावर परिणाम होण्याची शक्यता असली तरी UPI, इंटरनेट बँकिंग, मोबाइल बँकिंग आणि एटीएमसारख्या डिजिटल सेवा सुरू राहण्याची अपेक्षा आहे. मात्र धनादेश वटणे, सेटलमेंट आणि काही शाखास्तरीय व्यवहारांवर परिणाम होऊ शकतो. त्यामुळे ग्राहकांनी आवश्यक बँकिंग कामे संपापूर्वी पूर्ण करून ठेवावीत, असे आवाहन करण्यात आले आहे.
३० सप्टेंबरला बँकिंग क्षेत्राची सहामाही आर्थिक वर्षअखेरची प्रक्रिया आहे त्या अनुषंगाने हा संप महत्त्वाचा मानला जात आहे.
