मुंबई : महाराष्ट्र राज्य उत्कृष्ट सार्वजनिक गणेशोत्सव मंडळ स्पर्धा २०२६ साठी अर्ज सादर करण्याची मुदत वाढविण्यात आली असून, आता शुक्रवार, ११ सप्टेंबर २०२६ पर्यंत अर्ज करता येणार आहेत. राज्याचे सांस्कृतिक कार्यमंत्री ॲड. आशिष शेलार यांनी ही माहिती दिली.
राज्य शासनाच्या वतीने सन २०२५ पासून महाराष्ट्रातील गणेशोत्सव ‘महाराष्ट्राचा राज्य उत्सव’ म्हणून साजरा करण्यात येत आहे. या उत्सवांतर्गत महाराष्ट्र राज्य उत्कृष्ट सार्वजनिक गणेशोत्सव मंडळ स्पर्धेचे आयोजन करण्यात आले आहे.
यावर्षीपासून देशभरातील तसेच देशाबाहेरील सार्वजनिक गणेशोत्सव मंडळांसाठीही स्वतंत्र बक्षिसांची तरतूद करण्यात आली आहे. जास्तीत जास्त गणेशोत्सव मंडळांना स्पर्धेत सहभागी होता यावे, यासाठी अर्ज सादर करण्याच्या मुदतीत वाढ करण्यात आली आहे.
स्पर्धेसाठीचे अर्ज ganeshotsav.pldmka.co.in या संकेतस्थळावर ऑनलाइन पद्धतीने स्वीकारले जात आहेत. सार्वजनिक गणेशोत्सव मंडळांनी या संधीचा लाभ घेत मोठ्या संख्येने स्पर्धेत सहभागी व्हावे आणि तालुका, जिल्हा, राज्य, राष्ट्रीय तसेच आंतरराष्ट्रीय स्तरावरील पारितोषिके मिळवावीत, असे आवाहन सांस्कृतिक कार्यमंत्री ॲड. आशिष शेलार यांनी केले आहे.
