सोलापूर: शांती एज्युकेशन सोसायटीच्या ए. जी. पाटील पॉलिटेक्निक, सोलापूर येथील यांत्रिक अभियांत्रिकी विभागाच्या वतीने “ऍडिटिव्ह मॅन्युफॅक्चरिंग: संधी आणि आव्हाने” या विषयावर दोन दिवसीय राष्ट्रीय स्तरावरील ऑनलाइन फॅकल्टी डेव्हलपमेंट प्रोग्रॅम (FDP) आयोजित करण्यात आला. ही कार्यशाळा ऑनलाईन पद्धतीने पार पडली. ऍडिटिव्ह मॅन्युफॅक्चरिंग (3D प्रिंटिंग) ही उत्पादन क्षेत्रातील क्रांतिकारी संकल्पना असून, विविध औद्योगिक क्षेत्रांमध्ये तिचा वापर मोठ्या प्रमाणावर होत आहे. आधुनिक तंत्रज्ञानासोबत जुळवून घेण्यासाठी आणि शिक्षकांना अद्ययावत ज्ञान मिळावे, यासाठी या कार्यक्रमाचे आयोजन करण्यात आले. या कार्यशाळेच्या माध्यमातून ऍडिटिव्ह मॅन्युफॅक्चरिंगच्या संधी, उद्योग क्षेत्रातील उपयुक्तता, संशोधनातील योगदान आणि भविष्यातील आव्हाने यावर सखोल मार्गदर्शन करण्यात आले. या कार्यशाळेत देशभरातील अभियांत्रिकी व पॉलिटेक्निक महाविद्यालयांतील २०० हुन अधिक शिक्षकांनी सहभाग नोंदवला.
कार्यशाळेचे उद्घाटन संस्थेचे अध्यक्ष सिद्धेश्वर ए. पाटील, उपाध्यक्ष श्री. शिवानंद एस. पाटील, संस्थेचे कॅम्पस डायरेक्टर व महाविद्यालयाचे प्राचार्य डॉ. एम. ए. चौगुले आणि उपप्राचार्य श्री एस. के. मोहिते यांच्या प्रमुख उपस्थितीत झाले. प्रमुख पाहुणे म्हणून डॉ. के. पी. करुणाकरन (IIT-बॉम्बे) हे उपस्थित होते.
सदर कार्यशाळेसाठी डॉ. के. पी. करुणाकरन यांनी ऍडिटिव्ह मॅन्युफॅक्चरिंगमधील नव्या संशोधन प्रवाहांवर प्रकाश टाकला. डॉ. ए. एम. कुठे (VNIT- नागपूर) यांनी ऍडिटिव्ह मॅन्युफॅक्चरिंगच्या संशोधन संधी आणि नवीन ट्रेंड्स समजावून सांगितले. डॉ. व्ही. एस. जत्ती (बेनेट युनिव्हर्सिटी) यांनी 3D प्रिंटिंगमधील विविध तंत्रज्ञान आणि त्याचा औद्योगिक वापर याविषयी माहिती दिली तसेच श्री. शुभम गुप्ता (Altem Technologies, पुणे) यांनी औद्योगिक दृष्टीकोनातून व्यावसायिक संधी आणि उत्पादन विकासावरील सखोल चर्चा केली.
या कार्यक्रमाचे समन्वयक प्रा. बी. ई. नरोटे यांनी संपूर्ण कार्यक्रमाचे नियोजन केले. कार्यक्रमाच्या यशस्वी आयोजनासाठी प्रा. जे. पी. पिंजार, प्रा. व्ही. जी. आंबीगर, प्रा. ए. आर. मळेकर यांनी विशेष मेहनत घेतली. कार्यक्रमाच्या समारोप प्रसंगी विभागप्रमुख प्रा. आर. एस. मोटगी यांनी, आयोजक व सहभागी शिक्षकांचे आभार मानले आणि त्यांनी सांगितले की, “या कार्यशाळेतून सर्वांना अत्यंत महत्त्वाची माहिती मिळाली असून, भविष्यात अशा तांत्रिक उपक्रमांचे आयोजन केले जाईल, जेणेकरून शिक्षक आणि विद्यार्थी नवीन तंत्रज्ञानाच्या बदलांशी अधिक सहज जुळवून घेऊ शकतील”.
