पंढरपूर : सातारा-पंढरपूर एसटी बसवर 10 ते 12 दरोडेखोरांनी दगडफेक केली. त्यानंतर दरोडेखोरांनी एसटीवर ताबा मिळवला. त्यामुळे एकच खळबळ उडाली. माळशिरसजवळील पिलीव घाटात ही घटना घडली. याप्रकरणी माळशिरस पोलीस स्टेशनमध्ये फक्त चार अज्ञातांवर गुन्हा दाखल करण्यात आला आहे. कलम 394, 427 आणि सार्वजनिक मालमत्तेचे विद्रूपीकरण कलम 3 प्रमाणे गुन्हा दाखल करण्यात आला आहे.
नेमकं काय घडलं?
मंगळवारी रात्री साडेदहाच्या सुमारास सातारा-पंढरपूर रस्त्यावरील म्हसवड जवळच्या पिलीव घाटात 10 ते 12 अज्ञात दरोडखोरांनी एसटी आणि मोटरसायकल चालकावर दगडफेक केली. यामध्ये बसच्या काचा फुटल्या. मोटरसायकल चालक, बसमधील प्रवासी आणि बसचालक जखमी झाले. त्यानंतर या दरोडेखोरांनी गाडी थांबवत त्यावर ताबा मिळवला. तसेच, एसटीतील प्रवाशांना मारहाणसुद्धा करण्यात आली. या घटनेत एसटीच्या काचा फुटून मोठं नुकसान झालं.
