सोलापूर : सोलापूरमधील पहिले पंचतारांकित हॉटेल म्हणून ओळखल्या जाणाऱ्या बालाजी सरोवर येथील कोर्टयार्ड रेस्टॉरंटने आदरतिथ्य क्षेत्रात उल्लेखनीय कामगिरी केली आहे. द इकॉनॉमिक टाइम्स बिझनेस व्हर्टिकल्सच्या ईटी हॉस्पिटॅलिटीकडून ईटी रेस्टॉरंट्स अँड नाईटलाईफ अवॉर्ड्स २०२६ मध्ये कोर्टयार्ड रेस्टॉरंटला पश्चिम विभागातून ‘ऑल-डे डायनिंग रेस्टॉरंट ऑफ द इयर’ या प्रतिष्ठेच्या पुरस्काराने सन्मानित करण्यात आले. दि. २८ ऑक्टोबर रोजी नवी दिल्ली येथील हयात रिजेन्सीमध्ये आयोजित समारंभात हा पुरस्कार प्रदान करण्यात आला. या वेळी बालाजी सरोवरच्या वतीने गोपाल मिश्रा, रेस्टॉरंट मॅनेजर F&B आणि निखिल कंडपाल, एक्सिक्युटीव्ह किचन यांनी पुरस्कार स्वीकारला.
आदरतिथ्य क्षेत्रातील बदलते प्रवाह, ग्राहकांच्या अपेक्षा, खाद्यसंस्कृतीतील नवनवीन प्रयोग आणि पाहुण्यांना दिल्या जाणाऱ्या सेवांचा दर्जा या निकषांवर या क्षेत्रातील कामगिरीची दखल घेतली जाते. या पार्श्वभूमीवर बालाजी सरोवरच्या कोर्टयार्ड रेस्टॉरंटला मिळालेला हा पुरस्कार हॉटेलच्या दर्जेदार सेवा आणि खाद्यसंस्कृतीतील योगदानाची पावती मानली जात आहे.
याबाबत बालाजी सरोवरचे महाव्यवस्थापक विवेक जोशी म्हणाले, “भारतातील विविध राज्यांच्या खाद्यसंस्कृतीची ओळख सोलापूरकरांना व्हावी, यासाठी आम्ही दरवर्षी विविध फूड फेस्टिव्हलचे आयोजन करतो. या माध्यमातून देशाच्या विविध भागांतील वैशिष्ट्यपूर्ण खाद्यपदार्थ सोलापूरच्या खवय्यांसाठी उपलब्ध करून देण्याचा आमचा प्रयत्न असतो. हॉटेलमध्ये येणाऱ्या प्रत्येक पाहुण्याला दर्जेदार खाद्यपदार्थांसोबतच उत्कृष्ट सेवा आणि आनंददायी अनुभव देण्यावर आमचा विशेष भर असतो. पाहुण्यांनी येथे घालवलेला वेळ त्यांच्या कायम स्मरणात राहावा, हेच आमचे उद्दिष्ट आहे.”
बालाजी अमाइन्सचे व्यवस्थापकीय संचालक डी. राम रेड्डी यांनी या पुरस्काराबद्दल आनंद व्यक्त केला. ते म्हणाले, “हा पुरस्कार म्हणजे बालाजी सरोवरमधील प्रत्येक कर्मचारी आणि अधिकाऱ्याने घेतलेल्या मेहनतीची व उत्कृष्ट कामाची दखल आहे. संपूर्ण देशभरातील स्पर्धेतून बालाजी सरोवरची या पुरस्कारासाठी निवड होणे, ही आमच्यासाठी अभिमानाची बाब आहे. हा सन्मान केवळ बालाजी सरोवरचा नसून संपूर्ण सोलापूरकरांचा आहे.”
या पुरस्कारामुळे सोलापूरच्या आदरतिथ्य क्षेत्राला राष्ट्रीय स्तरावर ओळख मिळाली असून, दर्जेदार आदरातिथ्य, विविध खाद्यसंस्कृतींची मेजवानी आणि ग्राहकाभिमुख सेवा यांमधील बालाजी सरोवरच्या प्रयत्नांना आणखी बळ मिळाले आहे.
