ऊसदर संघर्ष समितीचा इशारा; पुढील आठवड्यात तीव्र आंदोलनाचा निर्णय
येस न्यूज मराठी नेटवर्क : साखर कारखान्यांचा गळीत हंगाम सुरू होऊन सुमारे २० दिवस उलटले, तरी कारखानदारांनी उसाचा पहिला उचल दर जाहीर केलेला नाही. त्यामुळे ऊसदर संघर्ष समितीने आक्रमक भूमिका घेतली असून, दर जाहीर न केल्यास राजकीय नेत्यांना गावबंदी करण्याचा इशारा दिला आहे.
पंढरपूर येथे झालेल्या बैठकीत सोलापूर जिल्ह्यातील साखर कारखानदारांनी उसाचा दर जाहीर करावा, अन्यथा खासदार, आमदार आणि कारखानदारांच्या अध्यक्षांना गावबंदी करण्याचे आवाहन करण्यात आले. मागणी मान्य न झाल्यास पुढील आठवड्यात तीव्र आंदोलन छेडण्याचा निर्णयही घेण्यात आला.
बैठकीला ऊसदर संघर्ष समिती, महाराष्ट्र नवनिर्माण सेना, संभाजी ब्रिगेड आणि विविध शेतकरी संघटनांचे पदाधिकारी उपस्थित होते. वाढता उत्पादन खर्च, खतांच्या किमती आणि पाणीटंचाईमुळे शेतकरी आर्थिक अडचणीत असताना उसाला योग्य दर मिळावा, अशी मागणी करण्यात आली.
ऊसदर जाहीर न केल्यास आगामी काळात आंदोलन तीव्र करण्याचा इशारा समितीच्या पदाधिकाऱ्यांनी दिला आहे.
