भगवे फेटे बांधून धारकऱ्यांचा शिस्तबद्ध सहभाग
सोलापूर : अग्रभागी मानाचा भगवा ध्वज…. त्यामागे मानाचे शस्त्र पथक… आणि त्यामागे भगवे फेटे परिधान केलेले धारकरी अशी श्री शिवप्रतिष्ठान हिंदुस्थानतर्फे मंगळवारी विजयादशमीच्या मुहूर्तावर श्री दुर्गामाता दौड मोठ्या उत्साहात झाली. नवरात्रीनिमित्त घटस्थापनेपासून शहरातून विविध भागांतून दररोज निघालेल्या श्री दुर्गामाता दौडीचा समारोप गुरूवारी विजयादशमीनिमित्त झाला.
प्रारंभी पुण्यश्लोक छत्रपति श्री शिवाजी महाराजांच्या मूर्तीचे आणि भगव्या ध्वजाचे पूजन सोलापूर महानगरपालिकेच्या स्थायी समितीच्या सभापती रंजिता चाकोते आणि भारतीय सैन्य दलातील निवृत्त सैनिक महेश करकंटी यांच्या हस्ते छत्रपती श्री शिवाजी महाराज चौक येथे झाले. यानंतर श्री दुर्गामाता दौडीस प्रारंभ झाला.
यावेळी आमदार देवेंद्र कोठे यांनी मानाचा भगवा ध्वज घेऊन श्री दुर्गामाता दौडीत सहभाग घेतला. देशासाठी जगायचं रं शिवबानं सांगावा धाडलाय रं, भारत हिंदुस्थान है हिंदूओंकी शान है, जय भवानी जय शिवराय आदी गीते, श्लोक म्हणत श्री दुर्गामाता दौड निघाली. वाटेत हिंदू बांधवांनी श्री दुर्गामाता दौडीचे रांगोळीच्या पायघड्या घालून, पुष्पवृष्टी करत स्वागत केले. शेकडो युवक एकाच वेळी रस्त्यावर चालत असूनही यावेळी असलेल्या शिस्तीचे नागरिकांनी कौतुक केले.
छत्रपती श्री शिवाजी महाराज चौकातून सुरु झालेली दौड बाळीवेस, कसबा गणपती, मसरे गल्ली, चौपाड श्री बालाजी मंदिर, चौपाड श्री विठ्ठल मंदिर, राजवाडे चौक, दत्त चौक, पाणीवेस, झुंजे बोळ, अनंत दूध डेअरी, माणिक चौक, श्री आजोबा गणपती मंदिरमार्गे श्री चौडेश्वरी मंदिरात विसर्जित झाली. या ठिकाणी आरती आणि ध्येयमंत्राने श्री दुर्गामाता दौडीचा समारोप झाला. यावेळी श्री शिवप्रतिष्ठान हिंदुस्थानचे धारकरी प्रचंड मोठ्या संख्येने उपस्थित होते.
