राजकीय रणधुमाळी : पदवीधर -शिक्षक निवडणूक भाजपला जड…!

विधान परिषद निवडणुकीच्या पुणे पदवीधर आणि शिक्षक मतदार संघातील मतदानाला आता अवघे आठ दिवस शिल्लक राहिल्यामुळे विविध उमेदवारांची आणि पक्षांची रणधुमाळी पाहायला मिळू लागली आहे. एकीकडे कॉक्रोज जनता पार्टीने निवडणूक आयुक्त ज्ञानेश कुमार यांच्या विरुद्ध आंदोलन करत भाजपला थेट आव्हान दिले आहे. त्यामुळे वातावरण गढूळ बनले आहे. तर दुसरीकडे राज्यातील 304 तालुक्यात दुष्काळ असल्यामुळे शासनाबद्दल रोष निर्माण झाला आहे. अशात पुणे पदवीधर आणि शिक्षक मतदार संघाची निवडणूक चुरशीची बनली आहे. पदवीधर मतदारसंघात भाजपने डॉक्टर स्मिता योगेश जाधव यांना उमेदवारी दिली आहे. तर महाविकास आघाडी कडून सनदी अधिकारी प्रभाकर देशमुख यांच्या कन्या हर्षदा देशमुख -जाधव यांना शरद पवारांनी मैदानात उतरविले आहे . शिक्षक मतदार संघात भाजपने डॉक्टर कौस्तुभ गावंडे यांना उमेदवारी दिली तर या मतदारसंघात महाविकास आघाडी कडून काँग्रेसने प्राध्यापक जयंत आसगावकर यांना उमेदवारी दिली आहे. महाविकास आघाडीने ही निवडणूक जिंकण्यासाठी जोरदार फिल्डिंग लावली आहे तर भाजपने महायुतीचे दोनही उमेदवार निवडून यावेत यासाठी मंत्र्यांची फौज प्रचारात उतरवली आहे. उद्या प्रदेशाध्यक्ष रवींद्र चव्हाण यांच्यासह भाजपचे नेते प्रचारासाठी येत आहेत. महाविकास आघाडीने देखील आज सोलापूरच्या हुतात्मा स्मृती मंदिरात जोरदार शक्ती प्रदर्शन केले. पुणे पदवीधर मतदारसंघात तीन लाख 88 हजार तर शिक्षक मतदार संघात अवघे 62000 मतदार आहेत . यामध्ये सोलापूर जिल्ह्यात पदवीधर मतदार 49,732 आहेत तर शिक्षक मतदार हे 15306 आहेत. त्यामुळे या निवडणुकीत सोलापूरचे मतदान निर्णायक ठरणार आहे.