सोलापूर जिल्हा परिषदेच्या विविध विभागांचा आढावा
सोलापूर : पुणे विभागाच्या विभागीय आयुक्त शितल तेली-उगले यांनी सोलापूर जिल्हा परिषदेला भेट देऊन विविध विभागांच्या कामकाजाचा आढावा घेतला. विभागनिहाय अहवाल वाचन घेतले.तसेच ग्रामीण भागातील नागरिकांना दर्जेदार शासकीय सेवा उपलब्ध करून देण्यासाठी सर्व विभागांनी समन्वयाने व नियोजनबद्ध पद्धतीने काम करावे. दुष्काळी परिस्थितीत पशुधनाच्या आरोग्याची काळजी घेण्यासह शासकीय योजनांची प्रभावी अंमलबजावणी करावी, असे मार्गदर्शन त्यांनी केले.
सोलापूर जिल्हा परिषदेच्या यशवंतराव चव्हाण सभागृहात आयोजित बैठकीत प्राथमिक शिक्षण विभागाच्या जिल्हा परिषद शाळांमधील भौतिक सुविधांच्या श्रेणीकरणासाठी निश्चित केलेल्या निकषांचा, महिला व बालविकास विभागाचा, आरोग्य विभागाचा तसेच ग्रामीण पाणीपुरवठा विभागाचा आढावा घेण्यात आला. याशिवाय आकांक्षीत तालुका कार्यक्रमांतर्गत अक्कलकोट व सांगोला तालुक्यांच्या कामकाजाचाही आढावा घेण्यात आला.
जिल्हा परिषदेचे मुख्य कार्यकारी अधिकारी कुशल जैन यांनी सेवा संकल्प अभियानांतर्गत राबविण्यात येणाऱ्या विविध उपक्रमांची माहिती सादर केली. तसेच सेवा संकल्प अभियानांतर्गत विभागीय आयुक्तांच्या हस्ते आयुष्मान भारत कार्डचे वितरण करण्यात आले.
तसेच विभागांनी कामकाजाचा नियमित आढावा घेऊन योजनांची प्रभावी अंमलबजावणी करावी आणि नागरिकांना दर्जेदार सेवा उपलब्ध करून द्याव्यात, असे मार्गदर्शन विभागीय आयुक्तांनी केले.
या बैठकीस मुख्य कार्यकारी अधिकारी कुशल जैन, अप्पर आयुक्त नितीन माने, अप्पर आयुक्त प्रांजल शिंदे, अतिरिक्त मुख्य कार्यकारी अधिकारी संदीप कोहिनकर, सहाय्यक आयुक्त राजनंदिनी भागवत, उपमुख्य कार्यकारी अधिकारी (ग्रामपंचायत) सूर्यकांत भुजबळ, विभागीय आयुक्त कार्यालयाचे विजय धनवरे यांच्यासह जिल्हा परिषदेचे सर्व विभागप्रमुख उपस्थित होते.
