मीटर कॅलिब्रेशनसाठी ८ डिसेंबरपर्यंत मुदत; प्रवाशांसाठी यूपीआय क्यूआर कोड व हेल्पलाईन क्रमांक प्रदर्शित करणे बंधनकारक
सोलापूर – प्रादेशिक परिवहन प्राधिकरण, सोलापूर यांच्या कार्यक्षेत्रातील तीन आसनी ऑटोरिक्षा व ई-रिक्षांसाठी दि. ९ ऑक्टोबर २०२६ पासून सुधारित भाडेदर निश्चित करण्यात आले आहेत. सुधारित भाडेदरानुसार मीटर कॅलिब्रेशन करण्यासाठी ऑटोरिक्षाधारकांना दि. ९ ऑक्टोबर ते ८ डिसेंबर २०२६ या कालावधीत ६० दिवसांची मुदत देण्यात आली आहे. ऑटोरिक्षा चालक व प्रवाशांच्या सोयीसाठी प्रादेशिक परिवहन कार्यालय, सोलापूर यांनी सुधारित भाडेदरानुसार तात्पुरते टेरिफ कार्ड तयार केले आहे. हे टेरिफ कार्ड दि. ८ डिसेंबर २०२६ पर्यंत वैध राहणार असून, त्यानंतर या टेरिफ कार्डचा वापर करता येणार नाही. त्यानंतर प्रवाशांकडून मीटरप्रमाणे भाडे स्वीकारणे बंधनकारक राहील. ऑटोरिक्षात यूपीआय क्यूआर कोड व हेल्पलाईन क्रमांक प्रदर्शित करणे आवश्यक सर्व ऑटोरिक्षा चालक-मालकांनी प्रवाशांच्या सोयीसाठी ऑटोरिक्षाच्या दर्शनी भागात यूपीआय (UPI) क्यूआर कोड तसेच हेल्पलाईन क्रमांक ९४२०५६४५१३ प्रदर्शित करणे बंधनकारक करण्याचा निर्णय प्रादेशिक परिवहन प्राधिकरणाने घेतला आहे.
भाडेदरासंदर्भातील तक्रारी येथे नोंदवा
ऑटोरिक्षा भाडेदरासंदर्भात प्रवाशांना कोणतीही तक्रार असल्यास प्रादेशिक परिवहन कार्यालय, सोलापूर यांच्या ०२१७-२३०३०९९ या दूरध्वनी क्रमांकावर कार्यालयीन वेळेत किंवा ९४२०५६४५१३ या हेल्पलाईन क्रमांकावर तक्रार नोंदवावी.
तसेच, ऑटोरिक्षाचालकांकडून मीटरप्रमाणे भाडे न आकारणे, जादा भाडे आकारणे, गैरवर्तणूक करणे आदींबाबत प्रवाशांनी dyrto.१३-mh@gov.in या ई-मेलवर ऑनलाइन तक्रार नोंदवावी किंवा प्रादेशिक परिवहन कार्यालयाकडे लेखी तक्रार सादर करावी.
रात्रीच्या प्रवासासाठी अतिरिक्त भाडेदर
प्राधिकरणाच्या कार्यक्षेत्रात रात्रीच्या प्रवासासाठी पुढीलप्रमाणे अतिरिक्त भाडेदर अनुज्ञेय आहेत- – महानगरपालिका क्षेत्र : रात्री १२ ते सकाळी ५ या कालावधीत २५ टक्के अतिरिक्त भाडे, – महानगरपालिका क्षेत्र वगळून इतर ग्रामीण भाग : रात्री १२ ते सकाळी ५ या कालावधीत ४० टक्के अतिरिक्त भाडे.
प्रवाशांच्या सामानासाठी शुल्क
ऑटोरिक्षामधून प्रवाशांसोबत नेण्यात येणाऱ्या ६० x ४० सेंटीमीटर आकाराच्या किंवा त्यापेक्षा मोठ्या नगासाठी ५ रुपये शुल्क आकारण्यास अनुज्ञेयता देण्यात आली आहे.
प्रवाशांनी सुधारित भाडेदरानुसार मीटरप्रमाणे भाडे द्यावे. ऑटोरिक्षा चालक-मालकांनी निर्धारित नियमांचे पालन करून प्रवाशांना सहकार्य करावे, असे आवाहन प्रादेशिक परिवहन कार्यालय, सोलापूर यांच्यामार्फत प्रसिध्दी पत्रकान्वये कळविण्यात आले आहेत आहे.
