दुष्काळाच्या सावटाखाली पदवीधर-शिक्षक निवडणुकीची राजकीय रणधुमाळी

महाराष्ट्र विधान परिषदेच्या पुणे विभाग पदवीधर आणि शिक्षक मतदारसंघाची निवडणूक जाहीर झाल्यानंतर पश्चिम महाराष्ट्रातील राजकीय वातावरण दुष्काळात देखील तापले आहे. पुणे, सातारा, सांगली, कोल्हापूर आणि सोलापूर या पाच जिल्ह्यांचा समावेश असलेल्या या मतदारसंघाकडे संपूर्ण राज्याचे लक्ष लागले आहे. ६ ऑक्टोबरपर्यंत उमेदवारी अर्ज दाखल करण्याची अंतिम मुदत आहे. सात ऑक्टोबरला अर्जाची छाननी तर 9 ऑक्टोबरला उमेदवारी अर्ज माघारी घेण्याची मुदत आहे. आणि 23 ऑक्टोबरला मतदान होणार आहे. या पुणे विभागातील पाच जिल्ह्यात 57 तालुके असून त्यातील 35 तालुके दुष्काळग्रस्त म्हणून जाहीर करण्यात आले आहेत.त्यामुळे दुष्काळाच्या सावटाखाली ही पदवीधर आणि शिक्षक मतदार संघाची निवडणूक रंगणार आहे. पुणे पदवीधर मतदारसंघाचे विद्यमान आमदार अरुण लाड आहेत. २०२० मध्ये त्यांनी भाजपचे संग्रामसिंह देशमुख यांचा सुमारे ४९ हजार मतांनी पराभव केला होता. लाड यांनी राष्ट्रवादी काँग्रेसमधून भाजपमध्ये प्रवेश केल्याने त्यांचे पुत्र शरद लाड यांचे नाव भाजपकडून संभाव्य उमेदवार म्हणून चर्चेत आहे. दुसरीकडे राष्ट्रवादी काँग्रेस (अजित पवार गट) कडून प्रताप ऊर्फ भैय्या माने यांचे नाव पुढे आले आहे. भाजपमध्ये राजेश पांडे यांच्यासह इतर इच्छुकांचीही नावे चर्चेत आहेत.
राष्ट्रवादी काँग्रेस (शरदचंद्र पवार) गटाकडून हर्षदा जाधव-देशमुख यांचे नाव चर्चेत आहे. मात्र अंतिम उमेदवारीबाबत पक्षांकडून अधिकृत घोषणा होणे बाकी आहे. पुणे शिक्षक मतदारसंघाचे विद्यमान आमदार जयंत दिनकर आसगावकर हे काँग्रेसकडून २०२० मध्ये विजयी झाले होते. त्यांनी अपक्ष उमेदवार दत्तात्रेय सावंत यांचा ६,८२३ मतांनी पराभव केला होता. यंदा आसगावकर पुन्हा निवडणूक लढविण्यास इच्छुक असल्याचे दिसत आहे. महायुतीमध्ये या जागेसाठी मोठी चुरस दिसत आहे. शिवसेना (शिंदे गट) कडून मंगेश चिवटे यांचे नाव चर्चेत आहे. भाजपकडून कौस्तुभ गावडे तसेच प्रा. डॉ. सचिन सानप यांची नावे चर्चेत आहेत. याशिवाय दत्ता सावंत आणि नंदकुमार सागर यांचीही नावे इच्छुक म्हणून चर्चेत आहेत.पुणे पदवीधर आणि शिक्षक या दोन्ही जागा पारंपरिकरित्या भाजपच्या ताब्यात असल्याचा दावा मंत्री चंद्रकांत पाटील यांनी केला आहे. या दोन्ही जागा मिळण्यासाठी भाजप आग्रही आहे. विशेषतः शिक्षक मदारसंघात भाजप विरुद्ध शिवसेना (शिंदे गट) अशी अंतर्गत रस्सीखेच दिसत आहे.