प्रत्येक शेतकऱ्याच्या बांधावर जाऊन पीक नुकसानीचे पंचनामे सुरू
-जिल्हाधिकारी एस. कार्तिकेयन
सोलापूर : महाराष्ट्रातील सुमारे ७५ टक्के तालुक्यांमध्ये दि. २६ सप्टेंबर रोजी दुष्काळ जाहीर करण्यात आला असून, यामध्ये सोलापूर जिल्ह्यातील सर्व ११ तालुक्यांचा समावेश आहे. दुष्काळग्रस्त शेतकऱ्यांना तातडीने मदत उपलब्ध करून देण्याच्या दृष्टीने जिल्ह्यातील सर्व तालुक्यांमध्ये दि. २८ सप्टेंबरपासून पीक नुकसानीच्या पंचनाम्यांना सुरुवात करण्यात आली आहे, अशी माहिती जिल्हाधिकारी एस. कार्तिकेयन यांनी दिली.
शेतकऱ्यांच्या नुकसानीचे अचूक मूल्यांकन होऊन त्यांना शासनाच्या मदतीचा लाभ तातडीने मिळावा, यासाठी नियमित पद्धतीने केवळ १० टक्के शेतांचे पंचनामे न करता प्रत्येक शेतकऱ्याच्या शेताच्या बांधावर जाऊन प्रत्यक्ष नुकसानीची नोंद करण्यात येणार आहे. त्यानुसार सर्व संबंधित यंत्रणांना पंचनाम्याचे काम तातडीने सुरू करण्याच्या सूचना देण्यात आल्या आहेत.
पुढील आठ दिवसांत पंचनामे पूर्ण करण्याचे नियोजन
दि. २८ सप्टेंबरपासून सुरू करण्यात आलेले पीक नुकसानीचे पंचनामे पुढील आठ दिवसांत पूर्ण करण्यात येणार आहेत. पंचनामे पूर्ण झाल्यानंतर पीक नुकसानीचा एकत्रित अहवाल शासनास सादर करण्यात येणार असून, त्यानुसार शेतकऱ्यांना शासनाच्या मदतीचा लाभ उपलब्ध करून देण्याची कार्यवाही करण्यात येणार आहे.
जिल्ह्यातील प्रत्येक तालुक्याच्या तहसीलदारांनी पंचनाम्याबाबत आवश्यक आदेश निर्गमित केले आहेत. त्यानुसार तलाठी, मंडळ अधिकारी आणि कृषी सहाय्यक यांच्या पथकांमार्फत प्रत्येक शेतकऱ्याच्या बांधावर जाऊन पीक नुकसानीचे पंचनामे करण्यात येत आहेत. पंचनाम्याचे काम विहित कालमर्यादेत पूर्ण करून नुकसानीचा अहवाल शासनास सादर करण्याच्या सूचना देण्यात आल्या आहेत.
दुष्काळाच्या पार्श्वभूमीवर शेतकऱ्यांना शासनाच्या मदतीचा लाभ तातडीने उपलब्ध करून देण्यासाठी जिल्हा प्रशासनाकडून पंचनाम्याच्या कामाला प्राधान्य देण्यात आले आहे. सर्व संबंधित अधिकारी व कर्मचारी यांनी प्रत्यक्ष शेतावर जाऊन पंचनामे करून पुढील आठ दिवसांत हे काम पूर्ण करावे, असे निर्देश देण्यात आले आहेत.
