21 हजार पाणीपुरीच्या पुऱ्यांपासून साकारला बाप्पा..
पुण्यातील फर्ग्युसन रस्त्यावर गणेश भेळच्या दालनाबाहेर तब्बल २१ हजार पाणीपुरीच्या पुऱ्यांचा वापर करून १३ फूट उंच आणि सुमारे १०-११ फूट रुंद अशी आकर्षक गणेश मूर्ती साकारण्यात आली आहे. पुण्याच्या गणेशोत्सवाला मोठी परंपरा आहे. पुण्याच्या गणपतींची आरास पाहण्यासाठी दुरवरुन भक्त लोक येत असतात. यंदा पाणी पुरी पासून तयार केलेला गणपती बाप्पा सर्वांचे लक्ष वेधत आहे.पाणीपुरीच्या २१ हजार पुऱ्यांपासून तब्बल १३ फूट उंच आणि ११ फूट रुंद गणपती बाप्पाची मूर्ती पुण्यातील फर्ग्युसन रोडवरील गणेश भेळ यांनी साकारली आहे.
कलाकार प्रशांत साळुंखे आणि ११ कामगारांनी बांबू व कागदाच्या चौकटीवर ही मूर्ती तयार केली आहे. यासाठी दोन महिने मेहनत घेण्यात आली. उत्सव संपल्यानंतर या पुऱ्यांचे पाण्यात विसर्जन न करता त्यापासून ऑर्गेनिक खत तयार केले जाणार आहे. मूर्ती सुरक्षित राहावी यासाठी त्यावर विशेष प्रक्रिया करण्यात आली असून कारागीर काळजी घेत आहेत. ही अनोखी कलाकृती पाहण्यासाठी व बाप्पाच्या दर्शनासाठी नागरिकांची व भाविकांची मोठी गर्दी होत आहे.
