MBBS शैक्षणिक शुल्कात भरमसाठ वाढ; पालक-विद्यार्थ्यांचे कंबरडे मोडले
सोलापूर : वैद्यकीय शिक्षणाच्या शुल्कवाढीला मंजुरी मिळाल्याने चालू शैक्षणिक वर्षात एमबीबीएस शिक्षण आणखी महाग झाले आहे. सोलापूरच्या अश्विनी रूरल मेडिकल कॉलेजचे वार्षिक एमबीबीएस शुल्क २०२६-२७ साठी तब्बल ११.३६ लाख रुपये करण्यात आले आहे. मागील वर्षी हे शुल्क १०.३३ लाख रुपये होते. म्हणजेच एका वर्षात १.०३ लाख रुपयांची वाढ झाली आहे.
दरवर्षी लाखोंचे शुल्क, त्यात वसतिगृह, भोजन, पुस्तके आणि अन्य खर्च यामुळे डॉक्टर होण्याचे स्वप्न सर्वसामान्य विद्यार्थ्यांच्या आवाक्याबाहेर जात आहे. गुणवत्ता असूनही आर्थिक परिस्थितीमुळे विद्यार्थ्यांनी वैद्यकीय शिक्षणापासून वंचित राहायचे का? वैद्यकीय शिक्षण आता गुणवंतांसाठी की केवळ श्रीमंतांसाठी? असा संतप्त सवाल पालक व विद्यार्थ्यांकडून उपस्थित होत आहे.
