महापौर आणि आयुक्तांचे आदेश धाब्यावर…! हे काम जोमाने सुरूच…

सोलापूर शहरात होटगी रोडवर महिला हॉस्पिटल ते विमानतळापर्यंत महाराष्ट्र राज्य इन्फ्रास्ट्रक्चर डेव्हलपमेंट कंपनीच्या माध्यमातून सुरू असलेल्या रस्त्याच्या सीमेंटीकरणाचे काम वादाच्या भोवऱ्यात सापडले आहे. महिला हॉस्पिटल पासून जेऊर पर्यंत 29 किलोमीटर साठी सुमारे 165 कोटी रुपये खर्च होत आहेत. हा रस्ता करताना महापालिकेला विश्वासात घेतले नाही असा दावा आता महापालिकेचे अधिकारी करत आहेत. त्यामुळे गेल्या दहा दिवसापूर्वी महापौर तसेच आयुक्तांनी महाराष्ट्र इन्फ्रास्ट्रक्चर डेव्हलपमेंट कंपनीच्या अधिकाऱ्यांसमवेत बैठक घेऊन तातडीने काम बंद करा अशा सूचना दिल्या. तरीही गेल्या आठ दिवसापासून जोमाने काम सुरूच आहे. काल रात्री विमानतळा शेजारील भाग्यश्री पार्क जवळ रस्त्याचे काम उरकण्यात आले. कुठे जलवाहिनी टाकण्यासाठी तर कुठे ड्रेनेज लाईन घालण्यासाठी महापालिकेला 12 ते 15 ठिकाणी हा नवा सिमेंटचा रस्ता फोडावा लागणारा असून त्यासाठी नऊ कोटी रुपयांचा निधी द्यावा अशी मागणी महापालिकेने केली आहे. रस्त्याची काम पूर्णत्वाकडे जात असताना नागरिकांची ओरड सुरू झाल्यामुळे महापालिकेला उशिरा शहाणपण सुचले. त्यात काम थांबवा अशा सूचना देऊन देखील काम सुरूच आहे. त्यामुळे महापौर आणि आयुक्तांच्या आदेशाला कंपनीने जुमानले नाही हेच यावरून दिसते.