सोलापूर : ८०व्या स्वातंत्र्यदिनानिमित्त सोलापूर शहर पोलीस आयुक्तालयाच्या वतीने स्वातंत्र्यदिनाचा कार्यक्रम उत्साहात पार पडला. पोलीस आयुक्त एम. राजकुमार यांच्या हस्ते ध्वजारोहण करण्यात आले. ध्वजारोहणानंतर उपस्थित अधिकारी व कर्मचाऱ्यांनी राष्ट्रगीताचे गायन करून राष्ट्रध्वजाला मानवंदना दिली.
या कार्यक्रमास सोलापूर शहर पोलीस दलातील वरिष्ठ अधिकारी, पोलीस कर्मचारी तसेच अन्य मान्यवरांची उपस्थिती होती. स्वातंत्र्यदिनाच्या पार्श्वभूमीवर पोलीस दलाच्या वतीने शहरातील कायदा व सुव्यवस्था अबाधित ठेवण्यासाठी केलेल्या कार्याचा गौरव करण्यात आला.
दरम्यान, पोलीस दलात उल्लेखनीय कामगिरी बजावणाऱ्या अधिकारी व कर्मचाऱ्यांचा पोलीस आयुक्त एम. राजकुमार यांच्या हस्ते सन्मान करण्यात आला. उत्कृष्ट तपास, गुन्हे उघडकीस आणणे, कायदा व सुव्यवस्था राखणे तसेच कर्तव्य बजावताना उल्लेखनीय योगदान देणाऱ्या अधिकारी-कर्मचाऱ्यांचे यावेळी कौतुक करण्यात आले.
स्वातंत्र्यदिनाच्या या कार्यक्रमातून देशसेवा, कर्तव्यनिष्ठा आणि नागरिकांच्या सुरक्षिततेसाठी सदैव तत्पर राहण्याचा संदेश देण्यात आला. पोलीस अधिकारी व कर्मचाऱ्यांनीही देशाच्या सुरक्षेसाठी आणि नागरिकांच्या सेवेसाठी आपले कर्तव्य प्रामाणिकपणे बजावण्याचा संकल्प केला.
