स्थायी समिती सभापती फिरकल्याच नाहीत..पत्रकारांच्या प्रश्नावर रोहिणी तडवळकरांची कोंडी
सोलापूर – सोलापूर महापालिकेतील पदाधिकाऱ्यांमधील असलेली गटबाजी मुख्यमंत्री देवेंद्र फडणवीस यांच्या वाढदिवसानिमित्त आयोजित केलेल्या पत्रकार परिषदेत पुन्हा ठळकपणे दिसून आली. 22 जुलै रोजी मुख्यमंत्री देवेंद्र फडणवीस यांच्या वाढदिवसानिमित्त 56 ठिकाणी विविध नगरसेवकांच्या वतीने कार्यक्रम आयोजित केले आहेत याची माहिती सांगण्यासाठी शहराध्यक्ष रोहिणी तडवळकर यांनी महापालिकेत सभागृह नेते नरेंद्र काळे यांच्या कार्यालयात सोमवारी सकाळी 11 वाजता पत्रकार परिषद आयोजित केली होती. याबाबत कालच पत्रकारांना मेसेज टाकण्यात आले होते. स्वतः शहराध्यक्ष रोहिणी तळवलकर सव्वा अकरा वाजता आल्या तर पक्षनेते नरेंद्र काळे साडेअकरा वाजता आले. पत्रकार परिषद सुरू झाल्यानंतर बारा वाजता महापौर आले. पत्रकार परिषद आहे याची कल्पना असूनही स्थायी समिती सभापती रंजीता चाकोते फिरकल्यास नाहीत. तर उपमहापौर ज्ञानेश्वरी देवकर यांना पत्रकार परिषद आहे असा कोणी निरोप दिला नव्हता. तरीही त्रयस्थ व्यक्तीकडून समजल्यावर त्या पत्रकार परिषद संपल्यावर आल्या.मात्र आम्ही निरोप दिलाय अशी खोटी माहिती शहराध्यक्ष रोहिणी तडवळकर यांनी दिली.
महापालिकेच्या कारभारात शहराध्यक्ष रोहिणी तडवळकर जास्त हस्तक्षेप करीत असल्याबद्दल नगरसेवकांचे प्रश्न पत्रकारांच्या माध्यमातून उपस्थित करण्यात आले. महापालिकेतील 30 कोटी रुपयांच्या ठेवी आय सी आय सी आय सी आय बँकेत ठेवण्याबद्दल स्थायी समिती मध्ये सभापती रंजीता चाकोते यांनी निर्णय घेतला. स्टेट बँक ऑफ इंडिया ने उपमहापौरांना पत्र देऊन आम्ही जादा दर देऊ असे सांगितले. निर्णय घेण्यापूर्वी उपमहापौर देवकर यांनी स्थायी समिती सभापती रंजीता चाकोते आणि पक्षनेते नरेंद्र काळे यांना याची कल्पना दिली मात्र दोघांनीही देवकर यांचे फोन उचलले नाहीत. साहजिकच 12 लाख रुपयांची नुकसान होत असल्याबद्दल त्यांनी आयुक्तांची भेट घेऊन याची माहिती दिली. यावरून रोहिणी तडवळकर यांनी पक्षाला सांगितल्याशिवाय उपमहापौरांनी असं आयुक्तांना परस्पर भेटू नये हे सुनावले. शिवाय त्यांच्या कार्यालयात सुरू असलेले नऊ लाखाचे फर्निचरचे काम नगर अभियांता सारिका आकुलवार यांना सांगून थांबविले. याच मुद्द्यावरून पत्रकारांनी रोहिणी तडवळकर यांच्यावर प्रश्नांचा भडीमार केली. मात्र महापौर विनायक कोंड्याल आणि पक्षनेते नरेंद्र काळे यांनी सारवासारव करून वेळ मारून नेली. कोट्यावधी रुपयाच्या भ्रष्टाचाराच्या विषयावर शहराच्या रोहिणी तळवळकर बोलत नाहीत आणि उपमहापौर ज्ञानेश्वरी देवकर यांच्या कार्यालयाचे अवघे आठ ते नऊ लाखाचे फर्निचरचे काम अडवतात यावरूनच त्यांचा महापालिकेच्या कामकाजातील हस्तक्षेप लक्षात येतो.
