TOP 25 । सोलापुरात फडकल्या भगव्या पताका.. पांढरा शुभ्र पेहेराव.. अन् शिस्तीचे दर्शन

गेल्या 22 दिवसापासून पाचशे किलोमीटरचा टप्पा पार करत शेगावच्या गजानन महाराज पालखीचे आज सकाळी सोलापूर शहरात मोठ्या उत्साही वातावरणात आगमन झाले. भगव्या पताका… शिस्तीचे दर्शन आणि टाळ मृदुंगाचा गजर करत आलेल्या या पालखी सोहळ्यात शेकडो सोलापूरकर सहभागी झाले. रूपा भवानी मंदिराजवळ सकाळी महापौर विनायक कोंड्याल यांच्यासह पदाधिकाऱ्यांनी पालखीचे स्वागत केले. या पालखी सोहळ्यात सातशे वारकरी, 100 ध्वज धारक 50 सेवेकरी, एक अश्व आणि दहा वाहने सहभागी आहेत. आज सकाळी हिप्परगा येथील मशरूम गणपती जवळ आरती झाली आणि त्यानंतर दहा वाजता रूपा भवानी चौकात या पालखीचे उत्साही वातावरणात आगमन झाले. पूर्व भागातील कुचन प्रशालेत आज पालखी मुक्कामाला असणार. उद्या सात रस्ता येथील उपलप मंगल कार्यालयात मुक्काम असेल. दमानी नगर येथील रेल्वे उड्डाणपुलाचे काम सुरू असल्यामुळे सोमवारी सकाळी ही पालखी उपलप मंगल कार्यालय – डीआरएम ऑफिस – जुना एम्प्लॉयमेंट चौक – डफरीन चौक – पार्क चौक या मार्गे भैय्या चौकात जाणार आहे. तिथून पुढे रेल्वे स्टेशन – मोदी पोलीस चौकी आणि भुयारी मार्गातून रामवाडी मार्गे ही पालखी दमानी नगर भागाकडे जाणार आहे. दमानी नगरातील सुंदरबाई डागा प्रशालेत दुपारचे भोजन करून ही पालखी पंढरीकडे प्रस्थान ठेवणार आहे.